නවසීලන්තයේ ක්‍රයිස්චර්ච් ගුවන්තොටුපොළේ සිට ඔස්ට්‍රේලියාවේ මෙල්බර්න් නුවර දක්වා පියාසර කළ ගුවන් යානයක භාණ්ඩ කුටියේ කූඩු කර සිටි ‘මිට්න්ස්‘ නමැති සුරතල් බළලකු ගමනාන්තයේදි ගොඩ බැස්වීමට ගුවන්තොටුපොළේ මෙහෙයුම් බාර නිලධාරීන්ට අමතක වීම හේතුවෙන් එම බළලා පැය 24ක කාලයක් නගර දෙක අතර ගමන් වාර 3ක් අඛණ්ඩව සංචාරය කිරීමේ අපූරු පුවතක් විදෙස් මාධ්‍ය වාර්තා කළේය.
‘මේන් කූන්‘ නමැති විශාල බළල් වර්ගයට අයත් අවුරුදු 8ක් වයසැති එම බළලා ඔස්ට්‍රේලියානු ජාතික කාන්තාවකට අයත් බවත්, මෙල්බර්න් නුවර ගමනාන්තයේදි ඇය පැය 3කට අධික කාලයක් බලා සිටියද, සිය සුරතලා ඇයටෙ නොලැබුණු බවත් වැඩිදුරටත් වාර්තා වේ. පසුව ඒ පිළිබඳ සොයා බැලීමේදී බළලා රැගත් කූඩුව තිබියදීම එම ගුවන් යානය නැවත ක්‍රයිස්චර්ච් නුවර බලා පියාසර කර ඇතැයි දැනගැනීමට ලැබී තිබේ.
සිය සුරතලා රැගත් ගුවන් යානය නැවත මෙල්බර්න් නුවරට ළඟා වනතුරු ඇයට තවත් පැය අටකට ආසන්න කාලයක් බලා සිටීමට සිදුවූ බව ද විදෙස් මාධ්‍ය සඳහන් කළේය.
වැරදීමකින් සිදුවූ එම අතපසුවීමට නවසීලන්ත ගුවන් සේවය ඇගෙන් සමාව ඉල්ලා ඇති අතර, බළලා දෙවතාවක් පියාසර කිරීම සඳහා වන ගුවන් ගමන් වියදම සිය සමාගම විසින් දරන බවට නිවේදනයක් ද නිකුත් කර තිබේ.
