කොළඹ – නුවර ප්‍රධාන මාර්ගයේ කිරිබත්ගොඩ නගරයේදී පෙරේදා (21) පස්වරුවේ ටිපර් රථයක් හා යතුරුපැදියක් එකිනෙකට ගැටීමෙන් යතුරුපැදියේ ගමන් කළ දෙදෙනාම බරපතළ තුවාල ලබා රෝහල්ගත කිරීමෙන් අනතුරුව යතුරුපැදියේ පිටුපස ගමන් කළ තැනැත්තා ජීවිතක්ෂයට පත් විය.
අනතුරින් මියගියේ බොරලැස්ගමුව ප්‍රදේශයේ පදිංචිව සිටි ඩී.පී.එච්. ප්‍රියනාත් හේමකුමාර නමැති 38 හැවිරිදි තැනැත්තෙකි. යතුරුපැදිය කඩවත දෙසට ධාවනය වෙමින් තිබියදී ටිපර් රථය ඊට ඉස්සර කිරීමට යෑමෙන් මෙම අනතුර සිදුව තිබිණ. තුවාල ලැබූ යතුරුපැදිකරු කොළඹ ජාතික රෝහලට ඇතුළත් කළ අතර, එහි පිටුපස ගමන් කළ තැනැත්තා රාගම මහ රෝහලට ඇතුළත් කිරීමෙන් පසුව මියගොස් තිබේ.
මියගිය තැනැත්තාගේ මරණ පරීක්ෂණය ඊයේ (22) රාගම මහ රෝහලේදී පැවැත්වීමට නියමිතව තිබිණ. අනතුරට සම්බන්ධ ටිපර් රථයේ රියැදුරු අත්අඩංගුවට ගෙන තිබේ. වේයන්ගොඩ ප්‍රදේශයේ පදිංචිකරුවකු වන එම පුද්ගලයා මහර මහේස්ත්‍රාත් අධිකරණයට ඉදිරිපත් කිරීමට කටයුතු කෙරිණි.
