විශ්‍රාමික යුද හමුදා නිලධාරියකුගේ රුපියල් ලක්ෂ 06ක පමණ වටිනාකමකින් යුත් එළ ගවයින් දෙදෙනකු සොරාගෙන ඇතැයි දකුණු කළුතර පොලීසිය කියයි.
කළුතර, නාගොඩ පදිංචි මද්දුමාගේ අනුර කුමාර ජයසිංහ (අවු.50) යන අය
විසින් කරනු ලැබූ පැමිණිල්ලට අනුව මේ පිළිබඳ පරීක්ෂණ ආරම්භ කළ බව පොලීසිය පවසයි. තමා වසර 10ක පමණ සිට මිතුරකුට අයත් ඉඩමක ගවයින් ඇති කරන අතර, ඉකුත් 20 වැනිදා රාත්‍රී 7.00ට පමණ ගවයින් 06 දෙනා මඩුවේ ගැට ගසා සිටි බවත් පෙරේදා (21) උදෑසන 6.30ට පමණ, ගවයින් දෙදෙනකු අඩු බවට මිතුරාගෙන් දුරකතන ඇමතුමක් ලද බවත් පැමිණිලිකරු සඳහන් කළ බව පොලීසිය කියයි. පසුව තමා පැමිණ පරීක්ෂා කිරීමේ දී කිසිවකු එළ ගවයින් දෙදෙනා කඹවලින් ලිහා රැගෙන ගොස්‍ තිබූ බව පැමිණිලිකරු සිය පැමිණිල්ලේ සඳහන් කර ඇතැයි ද පොලීසිය පවසයි. මෙම සිද්ධිය සම්බන්ධ වැඩිදුර පරීක්ෂණ දකුණු කළුතර පොලීසියේ වැඩබලන ස්ථානාධිපති, ප්‍රධාන පොලිස් පරීක්ෂක මිලාන්ත් ද සිල්වා මහතාගේ මෙහෙයවීම යටතේ පැවැත්වේ.
