බන්ධනාගාරවල සිටින රෝගී රැඳවූවන්ට ප්‍රතිකාර කිරීමේදී විෂමතා පවතින බවත් එම විෂමතා ඉවත් කර බන්ධනාගාර රෝහල තුළ සිරකරුවන්ට ප්‍රතිකාර කිරීමේ නිසි ක්‍රමවේදයක් ක්‍රියාත්මක කරන ලෙසත් සිරකරු අයිතිවාසිකම් සුරැකීමේ කමිටුවේ නියෝජිතයන් සෞඛ්‍ය ඇමැති වෛද්‍ය නලින්ද ජයතිස්ස මහතාගෙන් ඉල්ලීමක් කර ඇත. සිරකරු අයිතිවාසිකම් සුරැකීමේ කමිටුවේ නියෝජිතයන් පෙරේදා (28) සෞඛ්‍ය අමාත්‍යාංශයේදී සෞඛ්‍ය ඇමැති වෛද්‍ය නලින්ද ජයතිස්ස, සෞඛ්‍ය නියෝජ්‍ය ඇමැති වෛද්‍ය හසංක විජේමුණි මහත්වරුන් හමුවූ අවස්ථාවේදී මෙම ඉල්ලීම සිදු කර තිබේ. බන්ධනාගාර තුළ සිටින රෝගී සිරකරුවන්ට කිසිදු දේශපාලන භේදයකින් තොරව ප්‍රතිකාර කිරීමේ වැඩපිළිවෙළක් මේ වන විට අවශ්‍ය වී ඇති බවත් අදාළ සිරකරුවන්ගේ වත්පොහොසත්කම්, දේශපාලන උස්පහත්කම් ආදී වශයෙන් වෙන් වෙන් වශයෙන් නොසලකමින් සියලුම රෝගී සිරකරුවන්ට එකසේ ප්‍රතිකාර ලබා දීමට බන්ධනාගාර රෝහල් තුළ කටයුතු සලසන්නැයිද එහිදී ඇමැතිවරයාගෙන් තම කමිටුව ඉල්ලීමක් කළ බව සිරකරු අයිතිවාසිකම් සුරැකීමේ කමිටුවේ විධායක අධ්‍යක්ෂ නීතිඥ සේනක පෙරේරා මහතා කියයි. බන්ධනාගාර පද්ධතිය තුළම පවතින විශාල ගැටලුවක් වන තදබදය බන්ධනාගාර රෝහල් සඳහාද විශාල ගැටලුවක්ව පවතින බවත් එහි තදබදය අඩු කිරීම සඳහා අවශ්‍ය ක්‍රියාමාර්ග කඩිනම් කළ යුතු බවත් මෙහිදී අවධාරණය කර ඇත.
