බස් රථයක ගමන් කරමින් සිටි කාන්තාවකගේ රහස් ප්‍රදේශය ජංගම දුරකතනයක් මඟින් සූක්ෂ්ම ලෙස වීඩියෝගත කර එම වීඩියෝ දර්ශන සමාජ මාධ්‍ය ජාලා වෙත මුදා හරින බව පවසමින් ඇයගෙන් රුපියල් ලක්ෂ 2ක මුදලක් ඉල්ලීමේ පැමිණිල්ලකට අදාළව අත්අඩංගුවට ගත් සැකකරුවකු හා ඔහුට සහාය වූ අයකු සම්බන්ධයෙන් වැඩිදුර විමර්ශන සිදු කර ප්‍රධාන සැකකරු විසින් සිදු කරන ලද අපරාධ රැසක් හෙළි කර ගැනීමට හැකිව තිබේ.
එම විමර්ශන සිදු කළ අපරාධ විමර්ශන දෙපාර්තමේන්තුව, දුරකතන කුලුනු වාර්තා විශ්ලේෂණය කිරීමේදී ප්‍රධාන සැකකරු අනුරාධපුර දිස්ත්‍රික් ලේකම් කාර්යාලයේ වැසිකිළියක් තුළදී, නගරයේ පොදු වැසිකිළියක් තුළදී, බස් රථ තුළදී සහ නිවෙසක නාන කාමරයක් තුළදී කළමනාකාර සහකාරවරියන් දෙදෙනකුගේ හා පෞද්ගලික ආයතන සේවිකාවකගේ නිරුවත ඡායාරූපගත කර ඇති බවත්, නිවෙසක නාන කාමරයක මවක් සහ පාසල් සිසුවියක් දිය නාන අයුරු රහසිගතව පටිගත කර එම දර්ශන වට්ස්ඇප් ඔස්සේ යවා මුදල් ඉල්ලා තර්ජනය ඇති බවත් අනාවරණය කර ගෙන තිබේ.
මෙලෙස අත්අඩංගුවට පත්ව ඇත්තේ මහගල්කඩවල, පාලුසියඹලාව ප්‍රදේශයේ පදිංචි 36 හැවිරිදි පුද්ගලයකු සහ එම ප්‍රධාන සැකකරුට දුරකතන සිම් කාඩ්පත් ලබා දුන් ඉබ්බාගමුව, වලව්වත්ත ප්‍රදේශයේ පදිංචි 45 හැවිරිදි පුද්ගලයෙකි. අත්අඩංගුවට ගත් ප්‍රධාන සැකකරුගේ ප්‍රශ්නගත සිම් කාඩ් පතට අදාළව ලබාගෙන ඇති දුරකතන විශ්ලේෂණ වාර්තා පරීක්ෂා කිරීමේදී සැකකරු තවත් කාන්තාවන් රැසකගේ නිරුවත් දර්ශන පටිගත කර මෙම වීඩියෝ සහ ඡායාරූප දර්ශන වට්ස්ඇප් මාධ්‍ය ඔස්සේ අදාළ කාන්තාවන් වෙත යොමු කර තර්ජනය කර මුදල් ලබා ගැනීමට තැත් කර ඇති බව අපරාධ විමර්ශන දෙපාර්තමේන්තුවේ හෙළි කර ගෙන තිබේ.
ප්‍රධාන සැකකරු අත්අඩංගුවට ගන්නා අවස්ථාවේදී මෙම අපරාධ සඳහා යොදා ගත් ජංගම දුරකතන 5ක්, සිම් කාඩ්පත් කිහිපයක්, දත්ත ගබඩාවක් (මෙමරි චිප්) සන්තකයේ තිබී සොයා ගත් බවත්, ඔහු කලහකාරීව හැසිරෙමින් ප්‍රශ්නගත වීඩියෝ දර්ශන අන්තර්ගතව ඇති දත්ත ගබඩාවක් (මෙමරි චිප්) හානි කර දමා තිබූ බවත් අනාවරණය වී ඇත. අපරාධ පරීක්ෂණ දෙපාර්තමේන්තු නිලධාරීන් අධිකරණයට කරුණු වාර්තා කිරීමෙන් අනතුරුව මෙම ප්‍රධාන සැකකරු රක්ෂිත බන්ධනාගාරගත කෙරුණු අතර, අද (30) මෙම නඩුව යළි කැඳවීමට නියමිතය.
