කිතුල්ගල, ගෝනගමුව කොට්ටුන්න පාරේ බෑවුමකදී පෙරේදා (28) වේගය පාලනය කර ගත නොහැකිවූ යතුරුපැදියක් බෝක්කුවක හැපීමෙන් එහි ගමන් ගත් තරුණයන් තිදෙනකු අසල තිබූ ප්‍රපාතයකට වැටී බරපතළ තුවාල ලබා රෝහල් ගත කර ඇතැයි කිතුල්ගල පොලීසිය පැවසීය.
මෙම අනතුරින් තුවාල ලබා ඇත්තේ ගෝනගමුව ප්‍රදේශයේ පදිංචි වයස අවුරුදු 16,19 හා 23 යන වයස්වල පසුවන තරුණයන් තිදෙනෙකි. පොලීසිය සඳහන් කළේ, අනතුර සිදු වන අවස්ථාවේ යතුරුපැදියේ ගමන් කළ තිදෙනාගෙන් දෙදෙනකු හිස්වැසුම් පැලඳ නොසිටි බව අනාවරණය වූ බවයි. කිතුල්ගල දිසා රෝහලට ඇතුළත් කළ තුවාලකරුවන් වැඩිදුර ප්‍රතිකාර සඳහා කරවනැල්ල රෝහලට මාරුකර යවා ඇත. අනතුරට පත් තරුණයන් දෙදෙනකුගේ තත්ත්වය බරපතළ බැවින් දැඩි සත්කාර ඒකකයට ඇතුළත් කර ඇති අතර, එක් අයකුගේ පාදයට දැඩි ලෙස හානි සිදුව ඇති බව රෝහල් ආරංචි මාර්ග සඳහන් කළේය.
අනතුරට හේතුව යතුරුපැදියේ තිරිංග ක්‍රියා විරහිත වීමක් ද යන්න පිළිබඳව සොයා පොලීසිය විමර්ශන සිදු කරයි.
