සිය බිරිය සමඟ අනියම් හාදකමක් පවත්වාගෙන ගිය පුද්ගලයකුව බෝතල් කට්ටකින් කපා ඝාතනය කිරීමේ සිදුවීමක් හලාවත, මාදම්පේ පැරණි නගරයේ පට්ටයගමදී සිදුකර ඇත. පෙරේදා (28) රාත්‍රී 9.00ට පමුණ මේ සිදුවීම වී තිබෙන බව හලාවත මාදම්පේ පොලිසිය පවසයි. මෙහිදී බිරියගේ කට ද බෝතල් කට්ටකින් කපා දැමීම හේතුවෙන් හලාවත මහා රෝහලට ඇතුළත් කර ඇත. මෙලෙස ඝාතනයට ලක්ව ඇත්තේ මාදම්පේ ප්‍රදේශයේ තැනින් තැනට යමින් ජීවත් වූ 45 හැවිරිදි එදිරිසිංහගේ තුෂාර දිල්රුක්ෂ නමැත්තෙකි. මේ ඝාතනය සිදු කළ පුද්ගලයාගේ එක කකුලක් නොමැති අතර, ඔහු මාදම්පේ, තනිවැල්ල දේවාලය අසල යාචකයකු ලෙස සිටින අයකු වශයෙන් හඳුනාගෙන ඇත. සැකකරු මේ වනවිට පොලිස් අත්අඩංගුවට පත්ව ඇත.
ප්‍රහාරයෙන් බරපතළ තුවාල සිදුවී ඇත්තේ අනුෂා වසන්ති කුමාරි නම්වූ යාචක තැනැත්තියකි.
මේ පිළිබඳ මහේස්ත්‍රාත් පරීක්ෂණය සිදු කිරීමට නියමිතව තිබිණි . මෘතශරීරය හලාවත මහ රෝහලේ තැන්පත් කර ඇති අතර මහේස්ත්‍රාත් මරණ පරීක්ෂණයෙන් පසු පශ්චාත් මරණ පරීක්ෂණය සිදු කිරීමට නියමිතය.
මේ පිළිබඳව මාදම්පේ පොලීසියේ නිලධාරීහු පිරිසක් වැඩිදුර පරීක්ෂණ සිදු කරති.
