අවිස්සාවේල්ල විද්‍යාල මාවතේ තාවකාලික නවාතැන්පොළක ලැගුම්ගෙන සිටි තරුණයකුට තියුණු ආයුධවලින් පහරදී ඝාතනය කර ඇතැයි අවිස්සාවේල්ල මූලස්ථාන පොලීසිය පවසයි.
අවිස්සාවේල්ල මූලස්ථාන පොලිස් ස්ථානයේ උසස් නිලධාරියකු සඳහන් කළේ පෙරේදා රාත්‍රී කාලයේදී හෝ ඊයේ අලුයම් කාලයේදී මියගිය තරුණයා සහ එම නවාතැන්පොළෙහි ලැගුම්ගෙන සිටින තවත් තරුණයන් පිරිසක් අතර ඇති වූ ආරවුලක් දුරදිගයාමෙන් මෙම ඝාතනය සිදු වන්නට ඇති බවට සැක කරන බවයි.
මෙලෙස ඝාතනයට ලක්ව ඇත්තේ සාමිමලේ, සූරියකන්ද වත්ත ප්‍රදේශයේ පදිංචි 24 හැවිරිදි තරුණයෙකි.
අවිස්සාවේල්ල ප්‍රදේශයේ වෙළෙඳසලක රැකියාවක් ලැබීම හේතුවෙන් මියගිය පුද්ගලයා මෙම නවාතැන් පොළට මීට මාස දෙකකට පමණ පෙර පැමිණ ඇති බවට අනාවරණය වූ බව ද පොලීසිය පවසයි. ඝාතනය සම්බන්ධයෙන් පුද්ගලයන් සිවු දෙනෙකු මේ වනවිට සැකපිට අත්අඩංගුවට ගෙන ඇති අතර අවිස්සාවේල්ල මූලස්ථාන පොලීසිය මඟින් වැඩිදුර විමර්ශන සිදු කරනු ලබයි.
