පල්ලෙකැලේ එළිමහන් සිරකඳවුර මඟින් සංවිධාන කළ අන්තර් බන්ධනාගාර බැඩ්මින්ටන් තරගාවලියේ විවෘත කණ්ඩායම් ශූරතාව දිනා ගැනීමට බන්ධනාගාර මූලස්ථාන කණ්ඩායම සමත් විය. දිගන මහවැලි ගෘහස්ථ ක්‍රීඩාංගණයේදී පැවති තරගාවලියේ තියුණු මුහුණුවරක් ගත් විවෘත කණ්ඩායම් ඉසව්වේ අවසන් තරගයේදී මූලස්ථාන පිල හමුවේ කුරුවිට බන්ධනාගාර කණ්ඩායම පරාජයට පත් විය.
ක්‍රීඩක ක්‍රීඩිකාවෝ 300කට ආසන්න පිරිසක් එක්වූ තරගාවලියේ විවෘත කාන්තා ශූරතාව දිනා ගැනීමට කෑගල්ල බන්ධනාගාරයේ ටී.ජී.සි. ජයවර්ධන සමත් වූ අතර, අවුරුදු 40න් ඉහළ කේවල පිරිමි ශූරතාව කුරුවිට බන්ධනාගාරයේ මොහාන් ධනසේකර සහ අවුරුදු 50ට වැඩි පිරිමි ශූරතාව බන්ධනාගාර මූලස්ථානයේ එල්.ඩබ්.පී. කලන චමින්ද දයානන්ද හිමි කර ගත්හ.
තරගාවලියේ සමාරම්භක උත්සවය බන්ධනාගාර කොමසාරිස් ජනරාල් තුෂාර උපුල්දෙණිය මහතාගේ ප්‍රධානත්වයෙන් පැවති අතර, ත්‍යාග ප්‍රධානෝත්සවය බන්ධනාගාර නිලධාරීන්ගේ ක්‍රීඩා සංගමයේ ලේකම්, බන්ධනාගාර කොමසාරිස් (මෙහෙයුම් හා බුද්ධි) ගාමිණී බී. දිසානායක මහතාගේ ප්‍රධානත්වයෙන් සිදු විය.
මේ අවස්ථාවට 11 වැනි පාබළ සේනාංකයේ සේනාධිපති මේජර් ෙජනරාල් උපුල් කොඩිතුවක්කු, බන්ධනාගාර කොමසාරිස් (කර්මාන්ත) එස්.කේ. පල්ලේතැන්න, බෝගම්බර (දුම්බර) බන්ධනාගාර අධිකාරී ඒ.සී. ගජනායක, බන්ධනාගාර නිලධාරීන්ගේ ක්‍රීඩා සංගමයේ බැඩ්මින්ටන් සභාපති, බන්ධනාගාර අධිකාරී මොහාන් කරුණාරත්න සහ පල්ලේකැලේ එළිමහන් සිරකඳවුර බන්ධනාගාර අධිකාරී සුමුදු පෙරේරා මහත්වරු ඇතුළු ආරාධිතයන් රැසක් සහභාගි වූහ.
