සමාජ මාධ්‍යජාලා පාලනය කිරීම සඳහා පාකිස්තාන පාර්ලිමේන්තුවේ නව පනතක් සම්මත වූ බව විදෙස් මාධ්‍ය වාර්තා කරයි. මේ මස මුල් භාගයේදී එරට පාර්ලිමේන්තුවට ඉදිරිපත් කර ඇති එම පනත පාකිස්තාන මාධ්‍ය සංවර්ධන පනත ලෙස හඳුන්වනු ලබන බවත්, එමඟින් පාකිස්තානය තුළ සමාජ මාධ්‍ය පාලනය කිරීමට සහ ඩිජිටල් පුවත් හා අන්තර්ජාල පුවත් පාලනය කිරීමට රජයට බලය පැවරී ඇති බවත් විදෙස් මාධ්‍ය වැඩිදුරටත් වාර්තා කරයි.
මීට අමතරව සමාජ මාධ්‍යජාලා අධීක්ෂණය කිරීමට, මඟ ඇහිරීමට සහ ජාතික අවශ්‍යතාව මත ඉවත් කිරීමට බලධාරීන්ට බලය ලැබී ඇතැයි ද වාර්තා වේ. එම පනත මඟින් පනවා ඇති සීමාවන් උල්ලංඝනය කිරීමෙන් දඩ මුදලකට හෝ සිර දඬුවමකට යටත් වීමට සිදුවනු ඇතැයි ද විදෙස් මාධ්‍ය සඳහන් කරයි.
කෙසේ වුවද නව පනත මඟින් එරට මාධ්‍ය නිදහස සහ අන්තර්ජාල ප්‍රකාශන අයිතිය සීමා වනු ඇතැයි එරට මාධ්‍ය සංවිධාන, මානව හිමිකම් සංවිධාන සහ මාධ්‍යවේදීන්ගේ විවේචනයට මේ වනවිට ලක්වී ඇති බව වාර්තා වේ.
