13 හැවිරිදි පාසල් දැරියක් නීත්‍යනුකූල භාරකාරත්වයෙන් අපහරණය කර බරපතළ ලිංගික අපයෝජනයක් කළැයි කියන සිද්ධියට දැරිය ඉගෙනුම ලබන පාසලේ මුරකරුවකු අත්අඩංගුවට ගත් බව මාදම්පේ පොලීසිය කියයි. දැරිය පදිංචි නි‍ෙවස ආසන්නයේම පදිංචි මුරකරු වසර කිහිපයක සිටම මවුපියන්ගේ කැමැත්ත මත දැරිය පාසලට රැගෙන යෑමත් ආපසු කැඳවාගෙන ඒමත් කර ඇති බවත්, දැනට මාස හයක පමණ සිට දැරිය ඔහු සමඟ ප්‍රේම සම්බන්ධයක් ඇති කරගෙන ඇති බවට කරුණු හෙළිවන බවත් පොලීසිය කියයි.
සැකකරු කුලියට ගත් කාර් රථයකින් දුම්මලසූරිය පිහිටි හෝටලයක් වෙත රැගෙන ගොස් අවස්ථා දෙකකදී දැරියට බරපතළ ලිංගික අපයෝජන කර ඇති බවට කරුණු අනාවරණය වන බවත් දැරිය අධිකරණ වෛද්‍ය නිලධාරියා වෙත යොමු කිරීමට පියවර ගත් බවත් පොලීසිය කියයි. මෙලෙස අත්අඩංගුවට ගෙන ඇත්තේ කුඩා බිංගිරිය පනිරෙන්ඩාව පදිංචි 29 හැවිරිදි විවාහකයෙකි. දැරිය අපහරණය කිරීමට යොදා ගන්නා ලද කාර් රථයේ රියැදුරු ද දුම්මලසූරිය හෝටලේ හිමිකරු ද අත්අඩංගුවට ගැනීමට පරීක්ෂණ පවත්වන බවද පොලීසිය සඳහන් කරයි. මාදම්පේ පොලිස් ස්ථානාධිපති ප්‍රධාන පොලිස් පරීක්‍ෂක සමන් ඒකනායක මහතාගේ උපදෙස් මත කාන්තා පොලිස් පරීක්‍ෂක සඳමාලි රුද්‍රිගු මහත්මිය පරීක්ෂණ පවත්වයි.
