විසර්ජන පනත් කෙටුම්පතින් කාන්තා කටයුතු සඳහා වෙන්කර තිබෙන ප්‍රතිපාදන අඩු කිරීමට පසුගිය ආණ්ඩුව කටයුතු කිරීමට එරෙහිව ජාතික ජන බලවේගයේ කාන්තා සාමාජිකයන් පිරිසක් බත්තරමුල්ල පොල්දූව මංසන්ධියේදී පවත්වන ලද විරෝධතාවට බාධා කරමින් පොලීසිය ජල ප්‍රහාර එල්ල කිරීම සම්බන්ධයෙන් සිදු කළ විමර්ශන කටයුතු මේ වන විට අවසන් කර ඇති අතර, එම විමර්ශන වාර්තා මේ වන විට නීතිපති දෙපාර්තමේන්තුවට ලැබි ඇති බව නීතිපතිවරයා ඊයේ (30) ශ්‍රේෂ්ඨාධිකරණයට දන්වා සිටියේය.
එම සිද්ධිය මඟින් මූලික අයිතිවාසිකම් උල්ලංඝනය වී ඇති බවට තීරණය කරන ලෙස ඉල්ලා අගමැතිනි ආචාර්ය හරිනි අමරසූරිය මෙණෙවිය ඇතුළු පිරිසක් ගොනු කළ මූලික අයිතිවාසිකම් පෙත්සමක් කැඳවූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් මාධව තෙන්නකෝන් මහතා මේ බව දන්වා සිටියේය.
එස්. තුරෙයිරාජා , අචල වෙන්ගප්පුලි , අර්ජුන ඔබේසේකර යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් හමුවේ මෙම පෙත්සම කැඳවන ලදි.
එහිදී නීතිපතිවරයා වෙනුවෙන් අධිකරණය හමුවේ පෙනී සිටි නියෝජ්‍ය සොලිසිටර් ජනරාල් මාධව තෙන්නකෝන් මහතා සඳහන් කළේ, මෙකී සිද්ධිය සම්බන්ධයෙන් සිදු කරන ලද විමර්ශන කටයුතු මේ වන විට අවසන් කර ඇති බවය.
ඒ සම්බන්ධයෙන් වන වාර්තා නීතිපති දෙපාර්තමේන්තුවට ලැබී ඇති අතර, ඒ සම්බන්ධයෙන් අධ්‍යයනය කරගෙන යන බවද ඒ පිළිබඳව ගන්නා අවසන් තීරණය ඉදිරියේදී අධිකරණයට දැනුම් දීමට කටයුතු කරන බවද නියෝජ්‍ය සොලිසිටර් ජනරාල්වරයා එහිදී දන්වා සිටියේය.
ඒ සම්බන්ධයෙන් නීතිපතිවරයා ගන්නා ක්‍රියාමාර්ගය අනුව මෙම පෙත්සම් ඉදිරියට පවත්වාගෙන යන්නේද නැද්ද යන්න පිළිබඳව ඉදිරියේදී දැනුම් දෙන බව පෙත්සම්කාර පාර්ශ්වය වෙනුවෙන් පෙනී සිටි නීතිඥවරයා එහිදී අධිකරණයට දන්වා සිටියේය.
කරුණු සලකා බැලූ විනිසුරු මඬුල්ල මේ සම්බන්ධයෙන් වන නීතිපතිවරයාගේ ස්ථාවරය දැනුම් දීම සඳහා මෙම පෙත්සම අප්‍රේල් මස 03 කැඳවීමට නියම කළහ.
අගමැතිනි ආචාර්ය හරිනි අමරසූරිය මෙණෙවිය, ජාතික ජන බලවේගයේ ජාතික විධායක කමිටු සාමාජිකාවන් දෙදෙනෙකු සහ ජාතික ජන බලවේගයේ සාමාජිකාවන් වන නීතිඥවරියන් දෙදෙනකු විසින් මෙම පෙත්සම ගොනු කරනු ඇත.
පෙත්සමෙහි වගඋත්තරකරුවෝ ලෙස එවක වැඩබලන පොලිස්පති දේශබන්දු තෙන්නකෝන්, වැලිකඩ, තලංගම හා මිරිහාන පොලීසිවල ස්ථානාධිපතිවරු, නුගේගොඩ දිසාව භාර ජ්‍යෙෂ්ඨ පොලිස් අධිකාරිවරයා, නීතිපති ඇතුළු නවදෙනෙකු නම් කර සිටිති.
කාන්තා හා ළමා කටයුතු අමාත්‍යාංශයට අදාළ වැය ශීර්ෂය පිළිබඳ විවාදය පැවති දින පාර්ලිමේන්තුවට පිවිසෙන පොල්දූව මංසන්ධියේදී තමන් ඇතුළු කාන්තාවන් පිරිසක් සාමකාමී විරෝධතාවක නිරත වූ බව පෙත්සම්කාරියන් සඳහන් කර ඇත.
2024 වසර සඳහා වන විසර්ජන පනත් කෙටුම්පතේ කාන්තා කටයුතු සඳහා වෙන්කර තිබෙන ප්‍රතිපාදන සියයට 51 කින් අඩු කිරීමට ආණ්ඩුව ගෙන ඇති තීරණයට විරෝධය පළ කිරීම සහ ඒ පිළිබඳව මහජනතාව දැනුවත් කිරීම සඳහා මෙම විරෝධතාවය පැවති බව එහි සඳහන් වේ.
එම විරෝධතාවට කිසිදු සාධාරණ හේතුවක් නොමැතිව පොලිස් නිලධාරින් විසින් ජල ප්‍රහාර එල්ල කළ බව පෙත්සමෙහි දැක්වෙයි.
එහිදී කාන්තාවන් කිහිප දෙනෙකු අමානුෂික සැලකීම්වලට ලක් වූ බව එහි සඳහන් කර ඇත. පොලීසියේ මෙම ක්‍රියා කලාපය අත්තනෝමතික සහ අසාධාරණ බව පෙත්සමෙහි සඳහන් වේ.
එමඟින් ආණ්ඩුක්‍රම ව්‍යවස්ථාව මඟින් සහතික කර ඇති භාෂණයේ අයිතිය ඇතුළු මූලික අයිතිවාසිකම් උල්ලංඝනය වූ බවට ප්‍රකාශ කරන ලෙස පෙත්සම මඟින් අධිකරණයෙන් ඉල්ලා ඇත.
එම මූලික අයිතිවාසිකම් උල්ලංඝනය කිරීම වෙනුවෙන් එවක වැඩබලන පොලිස්පති දේශබන්දු තෙන්නකෝන් ඇතුළු වගඋත්තරකාර පොලිස් නිලධාරින්ගෙන් රුපියල් මිලියනය බැගින් වන්දි අය කර දෙන ලෙස මෙම පෙත්සමෙන් ඉල්ලා ඇත.
