කොල්ලුපිටියේ ‘මොනැක් එපාර්ට්මන්ට්’ සුපිරි නිවාස සංකීර්ණයේ රුපියල් මිලියන 11.61ක් වටිනා නිවෙසක් අල්ලසක් ලෙස ලබා ගැනීමේ චෝදනාවට හිටපු මුදල් ඇමැති රවී කරුණානායක මහතාට එරෙහිව පවරා ඇති අල්ලස් නඩුව ලබන මැයි 28දා විභාගයට ගැනීමට කොළඹ මහාධිකරණය දින නියම කළේය.
කොළඹ මහාධිකරණ විනිසුරු මහේන් වීරමන් මහතා ඉදිරියේ පෙරේදා (29දා) නඩුව කැඳවූ අවස්ථාවේ නඩුවේ දෙවැනි විත්තිකරුවකු වන අර්ජුන් ඇලෝසියස් බන්ධනාගාරය විසින් අධිකරණයට ඉදිරිපත් කරන ලදි.
විත්තියේ නීතිඥයෝ කරුණු දක්වමින් මෙම නඩුව හා සම්බන්ධිත නඩුවක් ශ්‍රේෂ්ඨාධිකරණය ඉදිරියේ විභාග වන බවට අධිකරණය දැනුවත් කර සිටියහ. එම නඩුව විභාගයට ගන්නා දිනයක් මේ දක්වා නියම කර නැති බැවින් මහාධිකරණ නඩුව විභාගයට ගැනීම දීර්ඝ දිනයකට කල් තබන ලෙස විත්තිය ඉල්ලා සිටියේය.
2016 වසරේ පෙබරවාරි 12දා සිට සැප්තැම්බර් 30දා අතර කාලය තුළ දී රජයේ සේවකයෙක් වන මුදල් ඇමැතිවරයා ලෙස කටයුතු කරමින් අල්ලසක් ලෙස මහ බැංකු බැඳුම්කර චෝදනාවට සම්බන්ධ පර්පචුවල් ට්‍රෙෂරිස් සමාගමේ සහ වෝල්ට් සහ රෝ ඇසෝසියේෂන් පෞද්ගලික සමාගමේ අධ්‍යක්ෂ අර්ජුන් ඇලෝසියස්ගෙන් රුපියල් මිලියන 11.61ක වටිනාකමකින් යුක්ත කොල්ලුපිටියේ ‘මොනැක් එපාර්ට්මන්ට්’ සුපිරි නිවාස සංකීර්ණයේ 5පීඑච්2 නිවෙස අල්ලසක් ලෙස ලබා ගැනීමේ චෝදනාව යටතේ නඩු පවරා තිබේ.
නීතිපතිවරයා විසින් රවී කරුණානායක සහ අර්ජුන් ඇලෝසියස්ට එරෙහිව
අධිචෝදනා 6ක් යටතේ නඩු පවරා තිබේ.
නඩු භාණ්ඩ ලෙස රවී කරුණානායක මුදල් ඇමැතිවරයා ලෙස පත් කළ අක්තපත්‍රය හා ගැසට් නිවේදනය, බදු ඔප්පුව, පෞද්ගලික බැංකුවකින් නිකුත් කළ චෙක්පත්වල සහතික පිටපත් ඇතුළු නඩු භාණ්ඩ 37ක් ඉදිරිපත් කර තිබේ. මෙයට අමතරව හිටපු ජනාධිපති ලේකම්වරයා ඇතුළු සාක්ෂිකරුවන් 52ක් පැමිණිල්ල විසින් නම් කර තිබේ. ජනාධිපති නීතිඥ රිසාඩ් සරූක් විත්තිය වෙනුවෙන් පෙනී සිටියේය.
