ජාතික ජන බලවේගයේ පාර්ලිමේන්තු මන්ත්‍රීනි නිලන්ති කොට්ටහච්චි මහත්මියට අපහාසාත්මක වන ආකාරයේ දැන්වීමක් සමාජ මාධ්‍ය ජාලය ඔස්සේ පළ කළේ යැයි කියන සිද්ධිය සම්බන්ධයෙන් අත්අඩංගුවට ගත් මිල්ලනිය ප්‍රාදේශීය සභාවේ හිටපු මන්ත්‍රී රවීන්ද්‍ර නම්මුනිට අයත් ජංගම දුරකතනය රජයේ රස පරීක්ෂකවරයා වෙත යොමුකර වාර්තාවක් කැඳවන ලෙස කොළඹ ප්‍රධාන මහේස්ත්‍රාත් තනුජා ලක්මාලි මහත්මිය ඊයේ (30) නියම කළාය.
සිද්ධියට සම්බන්ධ සැකකරු භාරයේ තිබී සොයාගත් ජංගම දුරකතනය රජයේ රස පරීක්ෂකවරයා වෙත යොමු කර වාර්තාවක් කැඳවීමට අවසර දෙන ලෙසට අපරාධ පරීක්ෂණ දෙපාර්තමේන්තුවේ නිලධාරීන් කළ ඉල්ලීමක් සලකා බලමින් අධිකරණයෙන් එසේ නියම කෙරුණි.
තමන්ට ලිංගික අඩන්තේට්ටම් වන ආකාරයේ පෝස්ටුවක් මුහුණුපොතේ පළ කර ඇති බැවින් ඒ සම්බන්ධයෙන් විධිමත් විමර්ශනයක් සිදු කරන ලෙස ඉල්ලා මන්ත්‍රීනි නිලන්ති කොට්ටහච්චි මහත්මිය ඉකුත් 31 දින අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන අංශය වෙත දැනුම්දීමක් කර ඇත. ඒ අනුව සැකකාර පුද්ගලයා අඟුරුවාතොට ප්‍රදේශයේ පිහිටි ඔහුගේ නි‍ෙවසේ දී අත්අඩංගුවට ගෙන තිබුණි.
අත්අඩංගුවට ගත් සැකකාර පුද්ගලයා මේ වන විට ඇප මත මුදා හැර ඇත. මෙම නඩුව ලබන ජූලි මස 17 වන දින අධිකරණය හමුවේ නැවත කැඳවීමට ද මහේස්ත්‍රාත්වරිය දින නියම කළාය.
