රිය අනතුරකදී පොලිස් වාර්තා නොමැතිව රක්ෂණ මුදල් දීමට රක්ෂණ සමාගම් කටයුතු කිරීම හේතුවෙන් මහා මාර්ගවල සිදු වන රිය අනතුරු පොලීසියට වාර්තා වීම් අසාමාන්‍ය ලෙස 2003 වසරේ සිට පහළ ගොස් ඇති බව පොලිස් සංඛ්‍යා දත්ත විශ්ලේෂණයේදී අනාවරණය වේ.
මේ හේතුව නිසා මහා මාර්ගවල සිදු වන රථවාහන අනතුරු සම්බන්ධයෙන් නිසි තක්සේරුවක් සිදු කිරීමෙන් ඒ සම්බන්ධයෙන් නිසි තීන්දු තීරණ ගැනීමට නොහැකි වන බව රථවාහන අංශයේ උසස් පොලිස් නිලධාරියෙක් සඳහන් කළේය.
මේ ගැන දීර්ඝ කාලයක් පුරා රක්ෂණ සමාගම් සමඟ මෙන්ම ඊට සම්බන්ධ බලධාරින් සමඟ සාකච්ඡා කළත් පැහැදිලි විසඳුමක් ලැබී නැති බව ද එම නිලධාරියා කීවේය.
විවෘත ආර්ථිකය 1977දී මෙරටට හඳුන්වා දෙන විට මෙරට ලියාපදිංචි රථවාහන ගණන 208,026කි. එම වසරේ මාරක රිය අනතුරු 811කින් පුද්ගලයන් 811 දෙනෙක් මියගොස් ඇත. මේ වසරේ සිදුව ඇතැයි කියන සමස්ත රිය අනතුරු ගණන 15,297කි.
පොලිසියට වාර්තා වන රිය අනතුරු ගණන 2003 වසර දක්වා ක්‍රමිකව වැඩි වීමක් පෙන්නුම් කළත් රක්ෂණ සමාගම් විසින් නව රක්ෂණ ක්‍රමයක් වාහන අනතුරු සම්බන්ධයෙන් හඳුන්වා දීමත් සමඟ එම වසරේ සිට ක්‍රමිකව වාහන අනතුරු වාර්තා වීම් අඩුවී ඇති බව පොලිස් රථවාහන සංඛ්‍යා දත්තවලින් අනාවරණය වේ.
2003දී මාරක රිය අනතුරු 1933කදී පුද්ගලයන් 2096 දෙනෙක් මියගොස් ඇති අතර, එම වසරේ පොලීසියට වාර්තා වී ඇති සමස්ත රථවාහන අනතුරු ගණන 59,444කි. මෙරට ඉතිහාසයේ පොලීසියට වාර්තා වී ඇති වැඩිම රිය අනතුරු ගණන වන්නේ ද මෙයයි.
එතැන් සිට ක්‍රමිකව පොලීසියට වාර්තා වන රිය අනතුරු ගණන අඩුවී ඇති අතර, 2024 වසරේ පොලීසියට වාර්තා වී ඇති සමස්ත රිය අනතුරු ගණන 24,608කි. 2003 වසරට සාපේක්ෂව සැසඳීමේදී 2024 වසරේදී අනතුරු වාර්තා වීම් අඩු වීම සියයට 50ක් ඉක්මවූ අගයකි. මාරක රිය අනතුරු 2272කදී මේ වසරේදී පුද්ගලයන් 2381 දෙනෙක් මියගොස් ඇත. 2024දී බරපතළ තුවාල ගෙන දුන් අනතුරු ගණන සටහන් වන්නේ 6762ක් ලෙසිනි. සුළු තුවාල ගෙන දුන් අනතුරු ගණන 9945කි. සෙසු ප්‍රමාණය අලාභ පමණක් සිදු වූ අනතුරුය.
මාරක සහ තුවාල ගෙන දෙන අනතුරු අනිවාර්යයෙන්ම වාර්තා වන බව සඳහන් කළ පොලිස් රථවාහන මූලස්ථානයේ අධ්‍යක්ෂ ජ්‍යෙෂ්ඨ පොලිස් අධිකාරී මනෝජ් රණගල මහතා දිනමිණ කළ විමසුමේදී වැඩිදුරටත් සඳහන් කළේ ගැටලුව පවතින්නේ අලාභ පමණක් සිදු වන රිය අනතුරු සම්බන්ධයෙන් බවත්, එම දත්තත් රක්ෂණ සමාගම් ඔස්සේ පොලීසියට ලැබෙන ක්‍රමවේදයක් සම්බන්ධයෙන් සාකච්ඡා පැවැත්වෙමින් ඇති බවත්ය.
