බදුරලිය පොලිස් වසමේ පුද්ගලයකු කපා කොටා පහරදී ඝාතනය කිරීම සම්බන්ධයෙන් සැකකරුවන් දෙදෙනකු පෙරේදා (29) රාත්‍රියේ අත්අඩංගුවට ගත් බව බදුරලිය පොලීසිය පවසයි.
මෙසේ ඝාතනයට ලක්ව ඇත්තේ බදුරලිය, මිණිකන්දල ප්‍රදේශයේ පදිංචි 33 හැවිරිදි එස්. ශාන්ත කුමාර නමැති විවාහකයකු බවත්, පහරදීම සම්බන්ධයෙන් අත්අඩංගුවට ගෙන ඇත්තේ ඝාතනයට ලක් වූ අයගේ මස්සිනා සහ මාමණ්ඩිය බවත් පොලීසිය පවසයි.
මියගිය අය නිරතුරුව බීමතින් පැමිණ බිරියගේ පියාට පහරදී හිරිහැර කිරීම සම්බන්ධයෙන් මස්සිනා උරණවීමෙන් ආරවුලක් ඇතිව තිබෙන බව පොලීසිය සඳහන් කරයි.
ඝාතනයට ලක් වූ පුද්ගලයා පෙරේදා (29) දහවල් ඔහුගේ බිරියගේ පියාට බණිමින් සිටින අවස්ථාවේදී එම ස්ථානයට පැමිණි මාමණ්ඩිය හා බිරියගේ සහෝදරයකු යැයි කියන පිරිවෙන් ගුරුවරයකු මරණකරුට සහ ඔහුගේ බිරියට කිතුල් පොල්ලකින් සහ මන්නා පිහියකින් පහර දී ඇතැයි හෙළිවී තිබෙන බව පොලීසිය පවසයි.
මෙම පහරදීමෙන් පසු සැකකරුවන් විසින්ම තුවාලකරුවන්ව බදුරලිය රෝහලට ඇතුළත් කර ඇත.
සිද්ධියට මැදිහත්ව මියගිය අයගේ බිරිය ද තුවාල ලබා ඇති අතර දෙදෙනාම බදුරලිය රෝහලට ඇතුළත් කිරීමෙන් පසු කළුතර නාගොඩ රෝහලට මාරුකර යවා ඇතැයි ද, එහිදී සැමියා මියගොස් ඇතැයි ද බදුරලිය පොලිස් අපරාධ විමර්ශන අංශය පවසයි.
36 හැවිරිදි සැකකාර පිරිවෙන් ගුරුවරයා සහ 72 හැවිරිදි මොරපිටිය ප්‍රදේශයේ පදිංචි ඔහුගේ පියා පොලීසිය මඟින් අත්අඩංගුවට ගෙන ඇත. පහරදීම සඳහා යොදාගත්තැයි පැවසෙන මන්නා පිහියක් සහ කිතුල් පොල්ලක් පොලිස් භාරයට ගෙන ඇත.
අත්අඩංගුවට ගත් සැකකරුවන් මතුගම උසාවියට ඉදිරිපත් කිරීමට නියමිතව තිබුණි. මියගිය අයගේ පශ්චාත් මරණ පරීක්ෂණය ඊයේ (30) නාගොඩ රෝහලේ දී සිදු කිරීමට නියමිතව තිබිණි.
