බණ්ඩාරවෙල බිඳුණුවැව සේවා සංස්කරණ අභ්‍යාස මධ්‍යස්ථානය මඟින් මේ වන විට ගොවීන්ට අවශ්‍ය නිර්දේශිත ප්‍රභේදයන්හි උසස් තත්ත්වයේ අර්තාපල් හා බිම්මල් බීජ නිෂ්පාදනය ඉහළ නංවා ඇති අතර අවශ්‍ය ගොවීන්ට එම බීජ හිඟයකින් තොරව මේ වන විට මිලදීගත හැකි බව එම ආයතනයේ ප්‍රධානී නියෝජ්‍ය කෘෂිකර්ම අධ්‍යක්ෂ (පුහුණු) ජී.ඒ.ඒ. ගුරුසිංහ මහතා පවසයි. ඒ මහතා මේ බව පැවසුවේ මේ සම්බන්ධයෙන් බදුල්ල දිස්ත්‍රික් කෘෂිකර්ම කමිටුව දැනුවත් කරමිනි.
කලකට ඉහත බිම්මල් බීජ හිඟයක් පැවතීම හේතුවෙන් ප්‍රදේශයේ බිම්මල් වගාකරුවන් අපහසුතාවයට පත්ව සිටි නමුත් මේ වනවිට අවශ්‍ය තරම් බීජ මිලදී ගත හැකි අතර අමෙරිකන් ඔයිසිටර්, ඇබලෝනි හා පින්ක් ඔයිස්ටර් යන වර්ගවල බිම්මල් බීජ සිය ආයතනය මඟින් කාර්යාල වේලාවන් තුළ ලබාගත හැකි බවත්, ග්‍රැනෝලා වර්ගයේ අර්තාපල් පෙර මූලික බීජ ඉතා පහසු මිලට ලබාගත හැකි බවත් ඒ මහතා කීය.
ඊට අමතරව සිය ආයතනයේ පටක රෝපණ අංශය මගින් ඇන්තූරියම්, කෙසෙල් හා ස්ට්‍රෝබෙරි පැළ පටක රෝපණ තාක්ෂණයෙන් නිෂ්පාදනය කෙරෙන අතර ඉදිරියේදී උඩවැඩියා (ඕකිඩ්) පැළ නිෂ්පාදනය ද අපේක්ෂා කරන බවත් නියෝජ්‍ය අධ්‍යක්ෂවරයා වැඩිදුරටත් සඳහන් කළේය.
