රුපියල් කෝටි දෙකක් පමණ වටිනා ‘කුෂ්’ මත්ද්‍රව්‍ය සන්තකයේ තබාගෙන ගුවන් මගින් මෙරටට පැමිණි සැකකරුවෙකු හා ඊට ආධාර අනුබල දුන් සැකකරුවෙකු කටුනායකදී ගුවන් තොටුපොළෙන් පිට වී යමින් සිටියදී , පොලිස් මත්ද්‍රව්‍ය කාර්යාංශයේ නිලධාරීන් පිරිසක් විසින් අත් අඩංගුවට ගෙන තිබේ.
ඊයේ (31) එම වැටලීම සිදුකර ඇත.
ඒ කටුනායක ගුවන්තොටුපොළ පැමිණීමේ පර්යන්තයේදීය.
අදාළ 36 හැවිරිදි සැකකාර පුද්ගලයා විසින් රැගෙන ආ ගමන් මලු තුළ කිලෝ ග්‍රෑම් 02 ක බරකින් යුතු ” කුෂ්” මත්ද්‍රව්‍ය තොගය සගවා ගෙන තිබූ අතර , මෙම ව්‍යාපාරිකයා ගුවන් තොටුපොළේ සිට රැගෙන යාම සදහා පැමිණ සිටි 31 හැවිරිදි පුද්ගලයෙකු ද පොලිස් මත්ද්‍රව්‍ය කාර්යාංශයේ නිලධාරීන් විසින් අත් අඩංගුවට ගෙන තිබේ .
අත්අඩංගුවට ගත් සැකකරුවන් හංවැල්ල හා උඩුගම්පල ප්‍රදේශවල පදිංචිකරුවන්ය.
පොලිස් මත්ද්‍රව්‍ය නාශක කාර්යංශයේ ගුවන්තොටුපොළ ඒකකය සිද්ධිය පිළිබඳ වැඩිදුර විමර්ශන සිදුකරයි.
කටුනායක ටී.කේ.ජී.කපිල
