Tuesday, May 6, 2025
Home » හෂාන් ගෙදර එයි

හෂාන් ගෙදර එයි

by mahesh
February 7, 2025 1:00 am 0 comment

ප්‍රින්ස් ගුණසේකර‍

බංග්ලාදේශ ජාතික කාන්තා ක්‍රිකට් කණ්ඩායමේ ප්‍රධාන පුහුණුකරු හෂාන් තිලකරත්න මහතා එම ධුරයෙන් ඉවත් වී ඇති අතර, එම තීරණය බංග්ලාදේශ ක්‍රිකට් ආයතනයට දැනුම්දී තිබේ.

තිලකරත්න මහතා 2022 ඔක්තෝම්බර් මාසයේදී වසර දෙකක කොන්ත්‍රාත්තුවක් මත එරට කාන්තා කණ්ඩායමේ ප්‍රධාන පුහුණුකරු ලෙස පත්විය. එම කොන්ත්‍රාත්තුව මෑතකදී අවසන් වුවද, බටහිර ඉන්දීය කොදෙව් සංචාරය දක්වා දීර්ඝ කර තිබිණි.

ශ්‍රී ලංකා පුහුණුකරුගේ ඉල්ලා අස්වීම තහවුරු කරමින්, බංග්ලාදේශ ක්‍රිකට් මණ්ඩලයේ කාන්තා දෙපාර්තමේන්තු භාර හබිබුල් බෂාර්, ක්‍රික්බස් වෙබ් අඩෙවියට පැවසුවේ ‘ඔහු තවදුරටත් සේවය කිරීමට කැමති නැති බව බටහිර ඉන්දීය කොදෙව් සංචාරයේදී පැවසුවා’ යනුවෙනි.

ක්‍රික්බස් වාර්තාවට අනුව, තිලකරත්න යටතේ ජාතික කාන්තා කණ්ඩායමේ ක්‍රියාකාරිත්වය පිළිබඳව බංග්ලාදේශ ක්‍රිකට් මණ්ඩලය එතරම් සෑහීමකට පත්ව නැත. මේ නිසා බංග්ලාදේශ ක්‍රිකට් පාලක මණ්ඩලය ශ්‍රී ලංකා පුහුණුකරු සමඟ ගිවිසුම අලුත් කිරීමට උනන්දුවී නැති බවද සඳහන් වේ. මෙය වටහා ගත් ඔහු තනතුර අත්හැරීමට තීරණය කළ බවත්, එම වගකීම දේශීය පුහුණුකරුවකුට පැවරීමට අවශ්‍ය බවත් එරට පාලක මණ්ඩලය සඳහන් කර ඇත.

ජනවාරි මාසයේ පැවති බටහිර ඉන්දීය කොදෙව් සංචාරය, කාන්තා පුහුණුකරු තිලකරත්න මහතාගේ අවසන් පැවරුම විය. මේ සංචාරයේදී, බංග්ලාදේශ කණ්ඩායම කො‍දෙව් කාන්තා කණ්ඩායමට එරෙහිව එක්දින තරගාවලිය 2-1ක් ලෙස සහ විස්සයි20 තරගාවලිය 3-0ක් ලෙස පරාජයට පත්විය.

එහිදී බංග්ලාදේශ කාන්තාවන්ට එක්දින තරගාවලිය ජය ගැනීමට හැකි වූයේ නම්, ඔවුන්ට එළඹෙන ලෝක කුසලානයට ක්‍රීඩා කිරීමට ඍජු අවස්ථාවක් ලැබෙනු ඇත. මේ හේතුවෙන් සුදුසුකම් ලැබීමේ තරගවලදී ඔවුන්ට බටහිර ඉන්දීය කොදෙව් සහ පාකිස්තානය වැනි කණ්ඩායම් සමඟ ක්‍රීඩා කිරීමට සිදුව ඇත

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT