ජනප්‍රිය ක්‍රිකට් වෙබ් අඩවියක් වන ක්‍රික්ඉන්ෆෝ වෙබ් අඩවිය සංවිධාන කරන වාර්ෂික ක්‍රිකට් සම්මාන උලෙළේදී ශ්‍රී ලංකා දඟ පන්දු යවන ක්‍රීඩක ජෙෆ්රි වැන්ඩර්සේ සහ ශ්‍රී ලංකා ක්‍රිකට් නායිකා චමරි අත්පත්තු සම්මාන දිනා ගැනීමට සමත්ව තිබේ.
පසුගිය වසරේ (2024) ක්‍රිකට් පිටියේ දැක්වූ දස්කම් පදනම් කරගනිමින් ක්‍රික්ඉන්ෆෝ වෙබ් අඩවිය 18 වැනි වරට සංවිධාන කරන මේ සම්මාන උලෙළේදී වැන්ඩර්සේ වසරේ හොඳම එක්දින පන්දු යැවීමේ දක්ෂතාව සඳහාත්, චමරි වසරේ හොඳම එක්දින පිතිකාරිනිය ලෙසත් නම් කෙරිණි.
ඉන්දියාවට එරෙහිව පසුගිය වසරේ අගෝස්තු 4 වැනිදා කොළඹ ආර්. ප්‍රේමදාස ක්‍රීඩාංගණයේ පැවති එක්දින තරගයේදී ඕවර 5ක් තුළ ඉන්දීය මුල් පෙළ පිතිකරුවන් 7 දෙනාගෙන් 6 දෙනකුම දවා ගනිමින් දැක්වූ දස්කම් හේතුවෙන් වැන්ඩර්සේට මේ සම්මානය හිමිවිය. එම තරගයේදී සිය හොඳම ජාත්‍යන්තර එක්දින පන්දු යැවීම සටහන් කළ ඔහු එහිදී ලබා දුන්නේ ලකුණු 33ක් පමණි. සිම්බාබ්වේ කණ්ඩායමට එරෙහිව කොළඹ පැවති තරගයේදී ලකුණු 19කට කඩුලු 7ක් බිඳ දැමූ වනිඳු හසරංග, ඉන්දියාවට එරෙහිව තෙවැනි එක්දින තරගයේදී ලකුණු 27කට කඩුලු 5ක් බිඳ දැමූ දුනිත් වෙල්ලාලගේත් මේ සඳහා නිර්දේශ අතරේ සිටියහ.
මේ සම්මාන සඳහා ඇෆ්ගනිස්තානයට එරෙහිව නොදැවී ද්විත්ව ශතකයක් වාර්තා කළ පැතුම් නිස්සංකගේ නමත් හොඳම එක්දින පිතිකරු ලෙස නිර්දේශවී තිබුණත් එංගලන්තයට එරෙහිව ඔස්ට්‍රේලියානු පිතිකරු ට්‍රැවිස් හෙඩ් නොදැවී රැස් කළ ලකුණු 154ක හේතුවෙන් ඔහුට සම්මානය හිමි විය.
චමරි අතපත්තු හොඳම එක්දින පිතිකාරිනිය ලෙස සම්මාන ලැබුවේ දකුණු අප්‍රිකාවට එරෙහිව එරටදී විශිෂ්ට ඉනිමක නිරත වෙමින් නොදැවී රැස් කළ ලකුණු 195 හේතුවෙනි. මේ සම්මානයට එම තරගයේදී දකුණු අප්‍රිකාව වෙනුවෙන් නොදැවී ලකුණු 184ක් රැස් කළ ලෝරා වොල්වාඩ්ගේ නම ද නිර්දේශ වී තිබිණි. චමරි 2023 වසරේත් මේ සම්මානයෙන් පිදුම් ලැබීම විශේෂත්වයකි. මීට අමතරව චමරි වසරේ නායිකාව ලෙසත් නිර්දේශ අතරට එක්ව සිටියාය.
මෙහිදී ඔලී පොප් (එංගලන්තය) සහ ශෙමාර් ජෝෂප් (කොදෙව්) හොඳම ටෙස්ට් පිතිකරු සහ පන්දු යවන්නා, ඉන්දියාවේ රෝහිත් ශර්මා සහ ජස්ප්‍රීට් බුම්රා විස්සයි20 පිතිකරු සහ පන්දු යවන්නා ලෙස සම්මාන ලැබූහ.
නිරෝෂාන් ප්‍රියංකර
