ජාත්‍යන්තර සමුපකාර සංවිධානයේ ආසියා පැසිපික් කලාපීය (T.CA.-A.P) වාර්ෂික මහා සම්මේලනය මෙවර කොළඹ දී පැවැත්වීමට තීරණය කර තිබේ.
පිලිපීනයේදී පසුගියදා පැවැති රැස්වීමේදී මේ තීරණය ගත් බව ජාත්‍යන්තර සමුපකාර සංවිධානයේ ආසියා පැසිපික් කලාපීය අධ්‍යක්ෂ, ශ්‍රී ලංකා ජාතික සමුපකාර මණ්ඩලයේ සභාපති සරත් වීරසිරි මහතා පවසයි. මේ පිළිබඳව වැඩිදුරටත් අදහස් දැක්වූ සභාපතිවරයා මෙලෙස ද කීවේය.
“මෙවර සම්මේලනය නොවැම්බර් මස 24 වැනිදා සිට 28 වැනිදා දක්වා උත්කර්ෂවත් අයුරින් කොළඹදී පැවැත්වීමට කටයුතු යොදා තිබෙනවා. මීට සමගාමීව ජාත්‍යන්තර සමුපකාර සහ වෙළෙඳ ප්‍රදර්ශනයක් පැවැත්වීමටත් බලාපොරොත්තු වෙනවා.
එක්සත් ජාතීන්ගේ සංවිධාන විසින් 2025 වසර ‘සමුපකාර වසර’ ලෙස ප්‍රකාශයට පත් කර තිබෙනවා. ජාත්‍යන්තර සමුපකාර සංවිධානයේ වැඩිම සාමාජිකත්වයක් හිමි වන්නේ ආසියා පැසිපික් කලාපයටයි. මේ කලාපයට රටවල් 29ක් ඇතුළත් වෙනවා. එහි සාමාජික සංවිධාන 107ක් තිබෙනවා.
චීනය, ඉන්දියාව, කොරියාව සහ ජපානය වැනි රටවල් අතරින් අපේ රටේ මෙවර සමුළුව පැවැත්වීමට අවස්ථාව හිමි වීම ඉතා වැදගත් වෙනවා.”
