දෙයියන්දර, නෙරලම්පිටිය ප්‍රදේශයේ මාර්ගයේ වැටී තිබී අහුලාගත් රුපියල් 115,000ක මුදල අයිතිකරු සොයා භාරදීමේ පුවතක් දෙයියන්දර පොලීසියෙන් පසුගියදා අසන්නට ලැබුණි.
නෙරලම්පිටිය මාර්ගයේදී මෙම මුදල අහුලාගෙන තිබුණේ නෙරලම්පිටිය ප්‍රදේශයේ පදිංචි දුෂ්මන්ත රණසිංහ මහතායි. ඔහු අහුලාගත් මුදල අයිතිකරු සොයා භාර දීමට තීරණය කර තිබුණි. ඒ අනුව ඔහු අහුලාගත් මුදල වාහනවල ආසන කුෂන් කරන නෙරලම්පිටිය ප්‍රදේශයේ පදිංචි හෙට්ටිගේ සිරිල් මහතාගේ බවට තහවුරු කර ගැනීමෙන් පසු දෙයියන්දර පොලිස් ස්ථානාධිපති ප්‍රධාන පොලිස් පරික්ෂක එච්.ජී.බී. සුවාරිස් මහතා ඉදිරියේ බාර දීමට කටයුතු කළේය.
මුදල බාරගත් හෙට්ටිගේ සිරිල් මහතා කියා සිටියේ, තමන්ට වාහනයක ආසන කුෂන් කිරීම සඳහා මෙම මුදල අත්තිකාරමක් ලෙස ලැබුණු බවත්, එම මුදල නැති වූ බැවින් නැවත මුදල් ලැබේ යැයි කියා කිසිම අවස්ථාවක නොසිතූ බවයි.
