රඹුක්කන, අලගල්ල රක්ෂිතයේ ඊයේ (23) පස්වරුවේ ගින්නක් හටගෙන ඇති බවට රඹුක්කන පොලිස් ස්ථානයට ලද පණිවිඩයකට අනුව විමර්ශනයක් ආරම්භ කර ඇති අතර කඩිනමින් එම ස්ථානයට ලඟා වූ පොලිස් නිලධාරින් හා ප්‍රදේශවාසින් එක්ව ගින්න මැඩ පැවැත්වීමට කටයුතු කර ඇත.
විමර්ශන නිලධාරින් අදාළ ස්ථානය වෙත යන අවස්ථාවේ ගම්වාසීන් විසින් රඳවාගෙන සිටි පුද්ගලයින් 07 දෙනෙකු මෙම ගිනි තැබීමට සැක බවට පවසමින් පොලීසිය වෙත භාර දී තිබුණි.
මෙම සැකකරුවන් අලගල්ල කන්ද රක්ෂිතයට අයුතු ලෙස ඇතුළු වී මෙම ගිනි තැබීම සිදුකර ඇති බවට දැනට සිදු කරන ලද විමර්ශනය අනුව අනාවරණය වී තිබේ.
ඒ අනුව සිද්ධියට සැකපිට තරුණයන් 07 දෙනා අත්අඩංගුවට ගෙන තිබෙන බවයි පොලීසිය පවසයි.
අත්අඩංගුවට ගත් සැකකරුවන් අවුරුදු 18 හා 19 වයස්වල පසුවන කඩුගන්නාව, පිලිමතලාව, හන්දෙස්ස හා බලන ප්‍රදේශවල පදිංචිකරුවන් වේ.
කෙසේවෙතත් රඹුක්කන පොලීසිය වැඩිදුර විමර්ශන සිදු කරනු ලබයි.
මේ අතර නල්ලතන්නිය සමනල ස්වභාවික රක්ෂිතයේ ඊයේ පස්වරුවේ හටගත් ගින්න සිඝ්‍රයෙන් රක්ෂිතය පුරා පැතිර යමින් පවතින බැවින් ගින්න පාලනය කිරිමට ගුවන් හමුදාවේ සහය ඉල්ලා ඇති බව හැටන් වන අඩවි ආරක්ෂක වි.ජේ.රුක්ෂාන් මහතා පවසයි.
නල්ලතන්නිය වාලමලෙයි වත්ත ප්‍රදේශයෙන් හටගත් ගින්න ප්‍රදේශයේ පවතින අධික වියළි කාලගුණයත් සමග කඳු මුදුණ දක්වා සිඝ්‍රයෙන් පැතිර ගොස් තිබුණි.
ගින්න පාලනය කිරීමට තම කාර්යාලයේ නිලධාරින් සහ යුද හමුදා භට පිරිස් එක්ව පියවර ගනිමින් සිටින බවයි වන අඩවි ආරක්ෂකවරයා පවසයි.
නල්ලතන්නිය පොලීසිය සැක පළ කරන්නේ, කිසියම් පිරිසක් මෙම රක්ෂිතයට ගිනි තබන්නට ඇති බවටයි.
මෙසේ රක්ෂිත වලට ගිනි තබන පුද්ගලයන් පිලිබඳව තොරතුරු වෙතොත් ළඟම ඇති පොලිස් ස්ථානය හෝ තම කාර්යාලය දැනුවත් කරන ලෙසට වන අඩවි ආරක්ෂක නිලධාරින් ඉල්ලා සිටි.
