හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ සහ ඔහුගේ මිත්තණියගේ ගිණුමේ තිබූ රුපියල් මිලියන 59ක මුදලක් සම්බන්ධයෙන් මුදල් විශුද්ධිකරණ පනත ප්‍රකාරව අපරාධ පරීක්ෂණ දෙපාර්තමේන්තුව අත්අඩංගුවට ගත් ඩේසි ෆොරස්ට් නමැත්තිය රුපියල් ලක්ෂ 50 බැගින් වූ ශරීර ඇප 03ක් මත මුදාහැරීමට කඩුවෙල මහේස්ත්‍රාත් චානිමා විජේබණ්ඩාර මහත්මිය ඊයේ (05) නියෝග කළාය.
ප්‍රකාශයක් ලබාදීම සඳහා ඇය ඊයේ (05) පෙරවරුවේ අපරාධ පරීක්ෂණ දෙපාර්තමේන්තුව හමුවේ පෙනී සිටීමෙන් අනතුරුව අත්අඩංගුවට ගෙන අධිකරණයට ඉදිරිපත් කළ අවස්ථාවේදී මෙම නියෝගය නිකුත් කෙරිණි.
සැකකාරිය වෙනුවෙන් ජනාධිපති නීතිඥ සම්පත් මෙන්ඩිස්, නීතිඥ ප්‍රේමනාත් සී. දොලවත්ත ඇතුළු නීතිඥ මඬුල්ලක් අධිකරණය හමුවේ පෙනී සිටියේය.
මෙහිදී ජනාධිපති නීතිඥ සම්පත් මෙන්ඩිස් මහතා අධිකරණයට කරුණු ඉදිරිපත් කරමින් මෙසේ ප්‍රකාශ කළේය.
“සැකකාරිය අවුරුදු 97ක් වයසැති කාන්තාවක්. 2013, 2017 සහ 2019 වසරවල ගිණුම්වලට මුදල් හුවමාරු වීමක් සම්බන්ධයෙන් ඇය අත්අඩංගුවට ගෙන තිබෙනවා. මේ විමර්ශනය වසර 10කට වඩා පැරණියි. 2015 නඩු පවරා තිබෙන්නේ. මේ සිද්ධිය සම්බන්ධයෙන් සැකකරුවන්ට අධිකරණයට දැනුම් දුන් පසුව ඉදිරිපත් වන ලෙස අධිකරණයෙන් දැනුම් දී තිබෙනවා. ඒ තරම්ම පැරණි නඩුවක්. නීතිපතිවරයාට නඩු ගොනුව 2017 වසරේ යොමු කර තිබෙනවා. පැරණි නඩුවක් සම්බන්ධයෙන් නැවත විමර්ශන ආරම්භ කර තිබෙනවා. අපිට ප්‍රකාශයක් දීමට පැමිණෙන ලෙස දැනුම් දුන්නා. අපි ආවා. අපිව අත්අඩංගුවට ගත්තේ නැහැ. මගේ සේවාදායිකාවට ඊයේ කාපු දෙයවත් අද මතක නැහැ. ඇය ඒ තරම්ම වයස්ගතයි. ශරීර ශක්තියෙන් එහා මෙහා යන්න පුළුවන් වුණාට, මතක ශක්තිය හොඳ තත්ත්වයක නැහැ. ඇයට ඇගේ නම ඇරෙන්න වෙන දෙයක් කියන්න මතකයක් නැහැ. උදේ ගත්තු කෑම වේල මොකක්ද කියලාවත් මතක නැතුව ඇති වයසත් එක්ක. එහෙම තත්ත්වයක විමර්ශන නිලධාරීන් 2013 වසරේ බැංකු ගිණුමක සිදුවුණු මුදල් ගනුදෙනු පිළිබඳ තොරතුරු අහනවා. ඒ නිසා ස්වාමීනි මෙම කරුණු සලකා බලා ඇය ඇප මත මුදාහරින්නැයි මා අධිකරණයෙන් ඉල්ලා සිටිනවා.”
මුදල් විශුද්ධිකරණ චෝදනා යටතේ 2016 වසරේදී අපරාධ පරීක්ෂණ දෙපාර්තමේන්තුව විමර්ශනයක් ආරම්භ කර තිබූ අතර ඇයට ඇප ලබා දීමට විරෝධයක් ඇද්දැයි මහේස්ත්‍රාත්වරිය අපරාධ පරීක්ෂණ දෙපාර්තමේන්තුවෙන් විමසා සිටි අතර එහිදී කිසිදු ප්‍රතිචාරයක් අපරාධ පරීක්ෂණ දෙපාර්තමේන්තුව දැක්වූයේ නැත.
මේ විමර්ශනය සම්බන්ධයෙන් රුපියල් මිලියන 59කට අධික මුදලක් තිබූ ස්ථිර තැන්පතු බැංකු ගිණුමක් පිළිබඳ කරුණු අනාවරණය වී ඇති අතර අදාළ ගිණුම යෝෂිත රාජපක්ෂ සමඟ හවුල් ගිණුමක් ලෙස පවත්වාගෙන ගොස් තිබුණේ ඔහුගේ මිත්තණිය වන ඩේසි ෆොරස්ට් නම් කාන්තාව බවට අපරාධ පරීක්ෂණ දෙපාර්තමේන්තුව කරුණු අනාවරණය කරගෙන තිබිණි.
කාල්ටන් ස්පෝර්ට්ස් නෙට්වර්ක් පෞද්ගලික සමාගමට එරෙහිව පවත්වාගෙන යන මුදල් විශුද්ධිකරණ විමර්ශනයේදී වත්කම් උපයා ගත් ආකාරය හෙළිදරව් කළ නොහැකි රුපියල් මිලියන 59කට ආසන්න මුදලක් තිබූ ගිණුමක් හවුල්කාරීව පවත්වාගෙන යෑම සම්බන්ධයෙන් මෙම සැකකාරිය අත්අඩංගුවට ගත් බව කරුණු දැක්වූ අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන කොට්ඨාසයේ නිලධාරීන් අධිකරණයට කියා සිටියේය.
සැකකාරියට එරෙහිව මුදල් විශුද්ධිකරණය වැළැක්වීමේ පනතේ 3 (1) වගන්තිය ප්‍රකාරව චෝදනා ගොනු කර ඇති බව ද අපරාධ පරීක්ෂණ දෙපාර්තමේන්තුව සැකකාර කාන්තාව අධිකරණයට ඉදිරිපත් කරමින් දැනුම් දුන්නේය.
මේ සිද්ධිය සම්බන්ධයෙන් යෝෂිත රාජපක්ෂ, සංජීව රණතුංග, ”කාල්ටන් ස්පෝර්ට්ස් නෙට්වර්ක්” (CSN) පෞද්ගලික සමාගම ඇතුළු සැකකරුවන් පිරිසකට චෝදනා ගොනු කර ඇති අතර අත්අඩංගුවට ගත් සැකකරුවන් ඇප මත මුදාහැර ඇත.
නඩුව යළි ජූලි 03 වැනිදා කැඳවීමට නියමිතයි.
සැකකාරිය වෙනුවෙන් ජනාධිපති නීතිඥ සම්පත් මෙන්ඩිස්, චමීර සිල්වා, මුදිත් ලොකුමුදලි, ප්‍රේමනාත් සී. දොලවත්ත, නුවන් ජයවර්ධන ඇතුළු නීතිඥ මඬුල්ලක් අධිකරණය හමුවේ පෙනී සිටි අතර පැමිණිල්ල වෙනුවෙන් අපරාධ පරීක්ෂණ දෙපාර්තමේන්තුවේ නිලධාරීහු අධිකරණය හමුවේ පෙනී සිටියහ.
