කිසියම් පිරිසක් විසින් තම පුතා පැහැරගෙන ගොස් පහරදී ඇති බවටත් පසුව ඔහු මහනුවර ජාතික රෝහල වෙත ඇතුළත් කර ඇති බවටත් නිත්තවෙල ප්‍රදේශයේ පදිංචිකරුවෙක් කටුගස්තොට පොලීසිය වෙත පැමිණිලි කර තිබේ.
ඉකුත් 28 වැනිදා තම පුතා නිවෙසින් පිටතට කැඳවා ගෙන ගිය මෙම පිරිස පසුව ඔහු ත්‍රිරෝද රථයක දමාගෙන ගොස් පහරදී ඇති බවට එම පහරකෑමට ලක්වූ තරුණයාගේ පියා විසින් මෙසේ පොලීසිය වෙත පැමිණිලි කර ඇත. එම පැමිණිල්ලට අනුව විමර්ශන ආරම්භ කළ අපරාධ විමර්ශන අංශයේ නිලධාරින් විසින් තරුණයා පැහැරගෙන ගිය බව පැවසෙන පිරිසෙන් දෙදෙනකු හා පැහැර ගැනීමට යොදාගත් බව පැවසෙන ත්‍රිරෝද රථය පසුගිය 02 වැනිදා අත්අඩංගුවට ගෙන තිබේ.
තවද මෙම පැහැරගෙන යාමට සම්බන්ධ බව පැවසෙන තවත් සැකකරුවන් දෙදෙනකු පසුගිය 03 වැනිදා පොලීසියට භාර වීමෙන් පසු අත්අඩංගුවට ගෙන තිබේ. පැහැර ගැනීමට ලක්වූ තරුණයා මහයියාව ප්‍රදේශයේ නිවෙසක් තුළට රැගෙන ගොස් පහරදීම සිදුකර ඇති අතර පසුව පහරකෑමට ලක්වූ තරුණයාගේ ඥාතින් විසින් ඔහුව බේරාගෙන මහනුවර ජාතික රෝහල වෙත ඇතුළත් කිරීමට පියවර ගෙන තිබිණ.
අත්අඩංගුවට ගත් සැකකරුවන් පිරිස මහනුවර මහේස්ත්‍රාත් අධිකරණය වෙත ඉදිරිපත් කිරීමට පියවර ගෙන ඇත.
