නීති විරෝධී ලෙස රැගෙන ආ විදේශිය දුම්වැටි 160,000ක තොගයක් සහ ඖෂධ පෙති තොගයක් කල්පිටියේදී නාවික හමුදා භාරයට ගෙන තිබේ.
ශ්‍රී ලංකා නාවික හමුදාව 06 වැනි දින කල්පිටිය ඉප්පන්තිව් වෙරළ ප්‍රදේශයේ සිදුකළ විශේෂ සෝදිසි මෙහෙයුමකදී, එම වෙරළ ප්‍රදේශයේ අත්හැර දමන ලද ඩිංගි යාත්‍රාවක තිබූ නීති විරෝධි ලෙස මෙරටට රැගෙන ඒමට උත්සාහ කරන ලද විදේශීය දුම්වැටි එක් ලක්‍ෂ හැටදහසක (160,000) තොගයක් සහ ඖෂධ පෙති විසි දෙ‍දහස් එකසියයක (22,100) තොගයක් සමඟ එම ඩිංගි යාත්‍රාවක් නාවික හමුදා භාරයට ගැනීමට කටයුතු කර තිබේ.
වයඹ නාවික විධානයට අයත් ශ්‍රී ලංකා නාවික විජය ආයතනයට ලද තොරතුරකට අනුව, උච්චමුණිය නාවික අනුඛණ්ඩයට අනුයුක්ත නාවික හමුදා විශේෂ යාත්‍රා බලගණයේ කණ්ඩායමක් යොදවා ඉප්පන්තිව් දූපතට ඔබ්බෙන් වූ මුහුදු ප්‍රදේශයේ සහ එම වෙරළ ප්‍රදේශයේ සිදුකළ මෙම විශේෂ සෝදිසි මෙහෙයුමේදී, ඉප්පන්තිව් වෙරළේ අත්හැර දමන ලද සැකකටයුතු ඩිංගි යාත්‍රාවක් නිරීක්‍ෂණය කර පරීක්‍ෂාවට ලක් කෙරිණි. එහිදී, එම ඩිංගි යාත්‍රාවේ තිබි නීති විරෝධී ලෙස මෙරටට රැගෙන ආ බවට සැක කෙරෙන විදේශීය දුම්වැටි එක් ලක්‍ෂ හැටදහසක (160,000) තොගයක් සහ ඖෂධ පෙති විසි දෙ‍දහස් එකසියයක (22,100) තොගයක් මෙලෙස නාවික හමුදා භාරයට ගැනීමට කටයුතු කර තිබේ.
නාවික හමුදා මෙහෙයුම් හමුවේ ගොඩබිමට රැගෙන යෑමට නොහැකිව ජාවාරම්කරුවන් මෙම විදේශිය දුම්වැටි තොගය සහ ඖෂධ පෙති තොගය මෙලෙස ඉප්පන්තිව් වෙරළේ අත්හැර දමා යන්නට ඇතැයි විශ්වාස කෙරේ.
නාවික හමුදා භාරයට ගත් ඩිංගි යාත්‍රාව, විදේශීය දුම්වැටි එක් ලක්‍ෂ හැටදහසක (160,000) තොගය සහ ඖෂධ පෙති විසි දෙ‍දහස් එකසියයක (22,100) තොගය ඉදිරි නීතිමය කටයුතු සඳහා පුත්තලම පොලිස් මත්ද්‍රව්‍ය නාශක කාර්යාංශය වෙත භාර දී තිබේ.
