මාවනැල්ල ඕවත්ත පාර හිඟුල ප්‍රදේශයේ හිඟුල් ඔයේ කළු පැහැති පොලිතින් බෑගයක බහා තිබූ මිනිස් සිරුරු දෙකකට අයත් අස්ථි කොටස් හමු වූ බව මාවනැල්ල පොලීසිය කියයි.
එම උරයේ තිබී හිස් කබල් දෙකක කොටස් හා සිරුරු කිහිපයක අයත් බවට සැක කළ හැකි අස්ථි කොටස් තොගයක් පෙරේදා (08) දහවල් ප්‍රදේශවාසීන්ගෙන් ලද තොරතුරක් මත සොයා ගත් බවද පොලීසිය කියයි.
හිඟුල ප්‍රදේශයේ පුද්ගලයකු සිය ගෙවත්තේ පොල් කඩා එය අහුලන්නට ඔය දෙසට ගිය අවස්ථාවේ තැඹිලි පැහැති කවරයක් තිබෙනු දැක ඇති බවත් පසුව ඔහු අත තිබූ පිහියෙන් උරයට පහරක් ගැසූ අවස්ථාවේදි උරය ගැලවි ගොස් හිස් කබල් කොටස් හා සිරුරු කිහිපයකට අයත් කොටස් දැක ඇති බව ද පොලීසිය කියයි.
හිස් කබල් දෙකක කොටස් උරයෙන් එළියට විසිවී ඇති අතර කළු පැහැති ටියුලිප් වර්ගයේ බෑගයේ සිරුරු කිහිපයකට අයත් බවට සැක කෙරෙන අස්ථි කොටස් තොගයක් බහා තිබියදි හිඟුල් ඔය ඉවුරේ ගල් පරයක් අසල තිබී ඇති බවද පොලිසිය පැවසීය.
සිද්ධිය සම්බන්ධයෙන් මාවනැල්ල පොලීසිය අධිකරණය හමුවට කරුණු ඉදිරිපත් කිරීමෙන් පසු මාවනැල්ල වැඩබලන මහේස්ත්‍රාත් නිසේදා කුමාරි ධර්මතිලක මහත්මිය විසින් ස්ථානීය පරීක්ෂණය සිදුකර අස්ථි කොටස් කෑගල්ල ශික්ෂණ රෝහලේ අධිකරණ වෛද්‍යවරයා හමුවට ඉදිරිපත් කිරීමට පොලීසියට නියෝග කළාය.
මාවනැල්ල පොලිස් ස්ථානාධිපති ප්‍රධාන පොලිස් පරීක්ෂක ලසන්ත කලුආරච්චි මහතාගේ නියෝග මත පොලිස් සැරයන් 571 වීරසිංහ, කෑගල්ල කොට්ඨාස අපරාධ ස්ථාන පරීක්ෂක ඒකකයේ පොලිස් පරීක්ෂක තිලකරත්ත, පොලිස් සැරයන්වරුන් වන 19642 ගුණසිංහ, 32928 සිරිමාන්න, පොලිස් කොස්තාපල් රියැදුරු 3954 ගුණතිලක යන නිලධාරින් වැඩිදුර විමර්ශන පවත්වති.
