සිය පොලිස් වසමේ අපරාධ වාර්තා වීම් අඩු බව ඉහළ පොලිස් නිලධාරීන්ට පෙන්වීමට පොලිස් ස්ථානයට වාර්තා වන දරුණු ගණයේ අපරාධ (ඩී.ගණයේ) පොලිස් පොත්වල සටහන් නොකර කොළ කැබැලිවල සටහන් කර වංචාවක නිරතවූ නාරම්මල පොලිස් ස්ථානයේ වැඩබලන ස්ථානාධිපතිවරයාගේ සහ අපරාධ අංශයේ ස්ථානාධිපතිවරයාගේ වැඩ තහනම් කිරීමට කුලියාපිටිය කොට්ඨාසය භාර ජ්‍යෙෂ්ඨ පොලිස් අධිකාරීවරයා පියවර ගෙන ඇත.
මෙසේ වැඩ තහනමට ලක්ව ඇත්තේ වැඩබලන පොලිස් ස්ථානාධිපති ධුරය දැරූ පොලිස් පරීක්ෂකවරයකුගේ සහ අපරාධ අංශයේ ස්ථානාධිපති ධුරය දැරූ උප පොලිස් පරීක්ෂකවරයකුගේය. වැඩබලන පොලිස් ස්ථානාධිපතිවරයා සහ අපරාධ අංශයේ ස්ථානාධිපතිවරයා විසින් කරනු ලැබූ මෙම වංචාව හෙළිවී ඇත්තේ පසුගිය 06 වෙනිදා නාරම්මල සිදුවූ ගව සොරකම් දෙකක් සම්බන්ධයෙන් ලද පැමිණිලි දෙකක් පොලිස් පොත්වල සටහන් කර නොගෙන කොළ කැබලිවල සටහන් කර ගැනීමක් ගැන ඉහළ පොලිස් නිලධාරීන්ට ලද තොරතුරක් සම්බන්ධයෙන් කළ විමර්ශනයේදීය.
නාරම්මල දීකිරිකෑව ප්‍රදේශයේ පුද්ගලයකුට අයත් රුපියල් ලක්ෂ 12ක් වටිනා එළ ගවයින් සිවු දෙනෙක් සහ එම ප්‍රදේශයේම පදිංචි තවත් පුද්ගලයකුට අයත් එළ ගවයකු සොරකම් කිරීමක් සම්බන්ධයෙන් එසේ කඩදාසිවල සටහන් තබමින් වංචාව සිදුකර ඇති බව උසස් පොලිස් නිලධාරියෙක් පැවසීය.
