මේජර් ජෙනරාල් සම්පත් කොටුවේගොඩ (විශ්‍රාමික) මහතා ආපදා කළමනාකරණ මධ්‍යස්ථානයේ නව අධ්‍යක්ෂ ජනරාල් වශයෙන් පසුගියදා (08) වැඩ භාර ගත්තේය.
දශක තුනකට අධික කාලයක් ශ්‍රී ලංකා හමුදාවේ කීර්තිමත් නිලධාරියකු වන මේජර් ජෙනරාල් කොටුවේගොඩ මහතා, උපායමාර්ගික නායකත්වය, අර්බුද කළමනාකරණය සහ ජාතික ආරක්ෂක විශේෂඥතාව යනාදී ක්ෂේත්‍ර යටතේ සුවිශේෂ දැනුම් සම්භාරයක් හිමි නිලධාරියෙකි.
1986 දී කැඩෙට් නිලධාරියකු ලෙස ශ්‍රී ලංකා යුද හමුදාවේ සේවයට බැඳී පුහුණුවෙන් පසු ශ්‍රී ලංකා කාලතුවක්කු රෙජිමේන්තුවට සම්බන්ධ වූ මේජර් ජෙනරාල් කොටුවේගොඩ මහතා වසර 36කට ආසන්න කාලයක් ශ්‍රී ලංකා යුධ හමුදාවේ වෘත්තීය ජීවිතය තුළ බළසේනාධිපති, අණදෙන නිලධාරි, සේනාංකාධිපති, ශ්‍රී ලංකා කාලතුවක්කු රෙජිමේන්තුවේ කර්නල් සේනාවිධායක, ආරක්ෂක සේනා ආඥාපති, ශ්‍රී ලංකා හමුදාවේ ස්වේච්ඡා හමුදාවේ සේනාවිධායක සහ නියෝජ්‍ය මාණ්ඩලික ප්‍රධානී ලෙස ද සේවය කර ඇත.
කළමනාකරණය පිළිබඳ ශාස්ත්‍රපති උපාධිය සහ ජාතික ආරක්ෂක පරිපාලනය පිළිබඳ ශාස්ත්‍රපති උපාධිය ද හිමිකරගෙන ඇති මේජර් ජෙනරාල් කොටුවේගොඩ මහතා අමෙරිකා එක්සත් ජනපදය, ඉන්දියාව, පකිස්තානය, ජපානය, බංග්ලාදේශය, පිලිපීනය සහ චීනය ඇතුළු රටවල් කිහිපයක යුද හමුදා සහ ආපදා ප්‍රතිචාර පිළිබඳව විදේශ පුහුණුව ලබා තිබේ.
