විදුලි රැහැන් ඇද උගුල් අටවා ඌරන් මැරීමට ගිය තම මිතුරා විදුලි සර වැදී මැරුණු පසු ඔහුව පාළු ළිඳකට පස් දමා වැසූ පුද්ගලයකු ඉකුත් 6 වැනිදා රාත්‍රියේ කරන්දෙණිය, දෙමටගහකන්ද ප්‍රදේශයේදී සැකපිට ප්‍රශ්න කිරීම සඳහා අත්අඩංගුවට ගත් බව ඇල්පිටිය පොලීසිය පවසයි.
කරන්දෙණිය, දෙමටගහකන්ද ප්‍රදේශයේ පදිංචි තිදරු පියකු වන මියගිය වලවි දූරගේ චන්ද්‍රතිලක නමැති 45 හැවිරිදි අයගේ මළ සිරුර මෙසේ පාළු ළිඳකට දමා පස්වලින් වසා ඇති බව සැකකරුගෙන් කරන ලද ප්‍රශ්න කිරීමේදී අනාවරණයවූ බව ද පොලීසිය පවසයි.
මියගිය තැනැත්තාගේ භාර්යාව වන කරන්දෙණිය” දෙමටගහකන්ද ප්‍රදේශයේ පදිංචි මොහොමඩ් ලෙබ්බේ මොහොමඩ් තුෂානි නන්දිකා යන අය විසින් තම පුරුෂයා ඉකුත් පෙබරවාරs 06 වැනිදා සවස් කාලයේ සිට අතුරුදන්වී ඇති බවට පෙබරවාරී 14 වැනිදා ඇල්පිටිය පොලිස් ස්ථානය වෙත පැමිණිල්ලක් සිදුකර තිබේ.
ලද තොරතුරකට අනුව මේ අතුරුදන් පුද්ගලයා සමඟ නිතර විදුලිය යොදා ඌරන් මැරීමට යන සැකකරුගෙන් කරන ලද ප්‍රශ්න කිරීමේදී සැකකරු විසින් වල් ඌරන් දඩයම් කිරීම සිදුකරන අවස්ථාවේදී ඔහු ඇද තිබූ විදුලි රැහැනේ පැටලී තමා සමඟ වල් ඌරන් මැරීමට ගිය සගයා මියගොස් සිටි බවත්, පසුව ඔහුගේ මරණය වසන් කිරීම සඳහා දෙමටගහකන්ද, නවදගල පදිංචි චමින්ද සමන් කුමාර අයගේ ඉඩමේ පිහිටි පරණ ළිඳට දමා පස්වලින් වසා දැමූ බවත් සැකකරු අනාවරණය කළ බවද පොලීසිය පවසයි.
බැකෝ යන්ත්‍රයක් මඟින් ළිඳ අවට පස් හාරා, දේහය ගොඩනැගීමේ කටයුතු සිදු කර ඇත.
මේ සිද්ධිය සම්බන්ධයෙන් සැකපිට ප්‍රශ්න කිරීම සඳහා අත්අඩංගුවට ගත් සැකකරු කරන්දෙණිය, දෙමටගහකන්ද, නවදගල පදිංචි 38 හැවිරිදි අයකු බවත් පොලීසිය පවසයි.
මියගිය අයගේ සිරුර ගොඩගැනීම ඇල්පිටිය මහේස්ත්‍රාත් මහේෂිකා වාසිලගේ මහත්මියගේ සහ ඇල්පිටිය විශේෂඥ අධිකරණ වෛද්‍ය නිලධාරි චමිල් ආරියරත්න මහතා ඉදිරියේ සිදු කළ අතර සිරුර ඒ වනවිටත් විනාශ වෙමින් තිබුණි. මහේස්ත්‍රාත් පරීක්ෂණයෙන් පසුව පශ්චාත් මරණ පරීක්ෂණයේ සඳහා මියගිය අයගේ සිරුර ඇල්පිටිය මූලික රෝහලේ මෘත ශරීරාගාරය වෙත රැගෙන යන ලදි.
ඇල්පිටිය මූලස්ථාන ප්‍රධාන පොලිස් පරීක්ෂක ඒ විජේසිංහ, අපරාධ අංශයේ ස්ථානාධිපති පොලිස් පරීක්ෂක රාජපක්ෂ යන නිලධාරීහු මේ පිළිබඳව පරීක්ෂණ පවත්වති.
