පාකිස්තානයේ අඛණ්ඩව සිදුවන ස්ත්‍රී පුරුෂ අසමානතාව සහ කාන්තා හිංසනය වැළැක්වීමට පියවර ගන්නා ලෙස ජාත්‍යන්තර කාන්තා දිනයේදි එරට මානව හිමිකම් සංවිධානය විශේෂ රැලියක් පවත්වා ඇතැයි විදෙස් මාධ්‍ය වාර්තා කරයි. පාකිස්තාන මානව හිමිකම් සංවිධානය සහ තායිවාන ප්‍රජාතන්ත්‍රවාදී පදනම ඒකාබද්ධව එම සැමරුම් රැලිය පවත්වා ඇති අතර, සියලුම කාන්තාවන් සහ ගැහැනු දරුවන් සඳහා අයිතිවාසිකම්, සමානාත්මතාව හා සවිබල ගැන්වීම යන එක්සත් ජාතීන්ගේ තේමාව යටතේ කාන්තාවන්ට යුක්තිය ඉටු කරන ලෙස පාකිස්තාන රජයෙන් ඉල්ලීමක් කර ඇතැයි ද විදෙස් මාධ්‍ය වැඩිදුරටත් වාර්තා කරයි. ස්ත්‍රී පුරුෂ සමානාත්මතාව මූලික මානව අයිතියක් බවත්, ආර්ථික හා සමාජීය වර්ධනයේ ප්‍රධාන සාධකයක් බවත් පෙන්වා දෙමින් පාකිස්තාන මානව හිමිකම් සංවිධානයේ සභාපති නවිඩ් වෝල්ටර් අවධාරණය කර ඇත්තේ වෘත්තීය වෙන් කිරීම්, වැටුප් පරතරයන්, අධ්‍යාපනය හා සෞඛ්‍ය සේවා වැනි අත්‍යවශ්‍ය සේවාවන් සඳහා පාකිස්තානයේ කාන්තාවන්ට ලැබී ඇත්තේ සීමිත අවස්ථාවක් බවය. පාකිස්තානයේ හින්දු සහ කතෝලික සුළුතර ප්‍රජාවට අයත් කාන්තාවන් මුහුණ දෙන දුෂ්කරතා සහ අර්බුද සම්බන්ධයෙන් ද මෙහිදී අවධානයට ලක්වී ඇතැයි වාර්තා වේ.
