අනුරපුර රෝහල් සිද්ධියේ සැකකරු අල්ලාගන්න පොලිස් කණ්ඩායම් 5ක් 
ඇමැති ආනන්ද විජේපාල
අනුරාධපුර රෝහලේ වෛද්‍යවරියකට අතවර කිරීමට සම්බන්ධ පුද්ගලයා අත්අඩංගුවට ගැනීම සඳහා පොලිස් කණ්ඩායම් පහක් යොදවා ඇතැයි මහජන ආරක්ෂක අමාත්‍ය ආනන්ද විජේපාල මහතා පාර්ලිමේන්තුවේදී ඊයේ (11) ප්‍රකාශ කළේය.
එසේම ඔහු කඩිනමින් අත්අඩංගුවට ගන්නා බවද ඇමැතිවරයා කීය.
අදාළ සැකකරු හමුදාවෙන් පලා ගිය අයකු බවට හඳුනාගෙන ඇති අතර අදාළ සැකකරු සිටින ඉසව්වද මේ වන විට හඳුනාගෙන ඇති බව ඇමැතිවරයා පැවසීය. අදාළ වෛද්‍යවරියට බරපතළ ලිංගික හිරිහැර සිදුකර ඇති බවත් සිද්ධිය සිදුවූ වහාම පොලීසිය මැදිහත්ව කටයුතු කර ඇති බවත් අමාත්‍යවරයා පැවසීය.
අමාත්‍ය ආනන්ද විජේපාල මහතා මේ බව සඳහන් කළේ අනුරාධපුර රෝහලේ වෛද්‍යවරියක පෙරේදා (10) බරපතළ ලිංගික හිරිහැරයකට ලක්ව ඇති බවත් ඒ සම්බන්ධයෙන් වහා විමර්ශනය කළ යුතු බවටත් විපක්ෂ නායක සජිත් ප්‍රේමදාස මහතා සිදුකළ ප්‍රකාශයට පිළිතුරු දෙමිනි.
අනුරපුර රෝහලේ සිද්ධියෙන් විශාල ආරක්ෂක ගැටලු මතුවෙනවා
විපක්ෂ නායක සජිත් ප්‍රේමදාස
අනුරාධපුර ශික්ෂණ රෝහලේ වෛද්‍යවරියක් බරපතළ ලෙස ලිංගික හිංසනයකට ලක්ව ඇති බවත් මේ සම්බන්ධයෙන් වහා විමර්ශනයක් කරන ලෙසත් විපක්ෂ නායක සජිත් ප්‍රේමදාස මහතා පාර්ලිමේන්තුවේදී ඊයේ (11) ප්‍රකාශ කළේය.
රාජකාරි නිරතව සිටින අතරතුර අදාළ කාර්යාලයට යාමේදී බාහිර පුද්ගලයකු පිහියක් පෙන්වා වෛද්‍යවරිය ගැටගසා බරපතළ ලෙස ලිංගික හිරිහැරයට ලක්කර ඇති බවද විපක්ෂ නායකවරයා පැවසීය.
මිට පෙර කිසිඳු අවස්ථාවක රෝහල් පද්ධතිය තුළ මෙවන් සිදුවීමක් සිදුවී නැති අතර මෙය බරපතළ ඛේදවාචකයක් බවද විපක්ෂ නායකවරයා පැවසීය.
මෙරට ඇති විශාලම රෝහලක් වන අනුරාධපුර රෝහලේදී මෙම සිදුවීමට ඇය මුහුණ දෙන්නේ රාජකාරිය කරන අතර බවත් ඇය රාජකාරියේ සිටියදී මෙවැනි දෙයක් සිදුවීම බරපතළ ගැටලුවක් බවත් වෛද්‍යවරියන්ගේ ආරක්ෂාව පිළිබඳ බරපතළ ගැටලු මතුව ඇති බවත් විපක්ෂ නායකවරයා පැවසීය.
අනුරාධපුර රෝහල තරම්වත් ආරක්ෂාවක් නැති රෝහල් සිය ගණනක් ඇති බවත් මින් වෛද්‍යවරියන් කම්පනයකට භීතියකට ලක්ව ඇති බවත් හෙතෙම පැවසීය. පසුගිය කාලයේ වෛද්‍යවරුන්ට එරෙහිව උසිගැන්වීම්වලට ප්‍රකෝපකාරී සිදුවීම්වලට මුහුණදීමට සිදුවූ බවත් එබැවින් මෙවැනි සිදුවීම් හෙළා දැකිය යුතු බවත් ජාතික ආරක්ෂාව ගැන කතා කරද්දි විහිළු කිරීම තුළ රාජ්‍ය සේවයේ නිරත වී සිටින නිලධාරිනියන් පවා අපහසුතාවට පත්වන බවද විපක්ෂ නායකවරයා පැවසීය. කාන්තාවන්ට වෛද්‍යවරියන්ට වෘත්තීය ක්ෂේත්‍රයේ හා රැකියාවල නිරත කාන්තාවන් මුහුණ දෙන ගැටලු ගැන කාන්තා දිනයේ කතා කර උත්සව පවා පැවැත්වුවත් අවසානයේ මෙවැනි සිදුවීම් නිසා කාන්තාව අසරණ වී ඇති බවත් දියණියක ඇති පියකු ලෙස මේ සිදුවීම් ගැන බරපතළ හැඟීමක් ඇති බවද පැවසීය. මේ සිදුවීමට අදාළව දැඩි පියවර ගත යුතු බවත් මෙවැනි ම්ලේච්ඡ තිරිසන් ක්‍රියා කරන අයට දැඩි දඬුවම් පැමිණවීමට අවශ්‍ය නීති සම්පාදනයට සහාය ලබා දෙන බවත් විපක්ෂ නායක සජිත් ප්‍රේමදාස මහතා පැවසීය.
සියලු ආයතන ඩිජිටල්කරණය කළ යුතුයි
මන්ත්‍රී රවී කරුණානායක
රාජ්‍ය සේවය වඩ වඩාත් කාර්යක්ෂම කිරීම සඳහා සියලු ආයතන ඩිජිටල්කරණයට ලක්කළ යුතු බව නව ප්‍රජාතන්ත්‍රවාදී පෙරමුණ පත්කළ මන්ත්‍රී රවී කරුණානායක මහතා පාර්ලිමේන්තුවේදී ඊයේ (11) ප්‍රකාශ කළේය.
රාජ්‍ය අංශයේ ආයතන ඩිජිටල්කරණයට ලක්කිරීම වෙනුවෙන් වැඩි වශයෙන් ප්‍රතිපාදන වෙන්කළ යුතු අතර කඩදාසිවලින් තොර ක්‍රමවේද හඳුන්වා දීම අතිශය වැදගත් බවද හෙතෙම පැවසීය. පාර්ලිමේන්තු මන්ත්‍රී රවී කරුණානායක මහතා මේ බව සඳහන් කළේ අය-වැය කාරක සභා අවස්ථාවේ විවාදය සඳහා සහභාගී වෙමිනි.
එහිදි වැඩිදුරටත් අදහස් දැක්වූ පාර්ලිමේන්තු මන්ත්‍රී රවී කරුණානායක මහතා
තාක්ෂණික අංශය වෙනුවෙන් වන බදු ඉවත් කරන්න. මම මුදල් ඇමති ලෙස සිටි කාලයේදී මේ ක්ෂේත්‍රයට විශාල මුදලක් වෙන් කළා. සියයට තුනක් හතරක් වගේ වෙන් කිරීමක් පර්යේෂණවලට වෙන්කර තිබෙනවා. ලෝකයේ රටවල් සාර්ථක වී තිබෙනවා. උපාය මාර්ගවලින් අපි ඉදිරියට යන්නේ කොහොමද කියලා බලන්න ඕන. අපිත් ඔවුන් ආදර්ශයට ගනිමින් ඉදිරියට යා යුතුයි. ලෝකයට අපි විවෘත විය යුතුයි. විවෘත ආර්ථිකය අපි හඳුන්වා දුන්නා. ඒකත් විවේචනයට ලක් කළා. දැන් ඩිජිටල්කරණය කරලියට ඇවිත් තිබෙනවා. අනිවාර්යයෙන්ම ඩිජිටල්කරණය සිදු කළ යුතුයි. යහපාලන ආණ්ඩුව කාලේ මේ ඩිජිටල් හැඳුනුම්පතක් ලබාදීමේ සැලසුමක් තිබුණා. එය ක්‍රියාවට නංවන්න.
ඒ වගේම අනන්‍යතා කාඩ්පත අපේ ජනතාවට ලබාදිය යුතුයි. නිලධාරිවාදයට ඉඩ දෙන්න එපා. මෙතනදී නිලධාරින්ට අවශ්‍ය විදිහට කටයුතු කරන්න එපා. රජයක් ලෙස අවශ්‍ය තීන්දු තීරණ ගන්න. ඔබට හොඳ කණ්ඩායමක් සිටිනවා. කඩදාසිවලින් තොර ක්‍රමවේදයක් හදන්න. ඩොනල්ඩ් ට්‍රම්ප් බලන්න. ඊලොන් මස්ක් යටතේ නව ක්‍රමවේද ඇතිකර තිබෙනවා. ඒ වෙනුවෙන් අවශ්‍ය ප්‍රතිපාදන වෙන්කර තිබෙනවා.
දේශපාලන භේදයකින් තොරව ඩිජිටල් ආර්ථික යටිතල පහසුකම් සංවර්ධනය කිරීමට සහාය දෙනවා
මන්ත්‍රී හර්ෂ ද සිල්වා
හාන්ස් විජේසූරිය වැනි වියතුන් සම්බන්ධ කරගෙන ජනාධිපතිවරයා යන ගමන ගැන සතුටට පත්වන බව සමඟි ජන බලවේගයේ කොළඹ දිස්ත්‍රික් මන්ත්‍රී ආචාර්ය හර්ෂ ද සිල්වා මහතා පාර්ලිමේන්තුවේ දී ඊයේ (11) පැවසීය.
කුමන දේශපාලන මතයක් දැරුවද, දේශපාලන භේදයකින් තොරව ඩිජිටල් ආර්ථික යටිතල පහසුකම් සංවර්ධනය කිරීමට සහාය දෙන බව ද මන්ත්‍රීවරයා ප්‍රකාශ කළේය.
අය-වැය තෙවැනි වර කියවීමේ විවාදයට එක්වෙමින් මන්ත්‍රීවරයා මේ බව කියා සිටියේය. මන්ත්‍රීවරයා මෙසේද පැවැසුවේය. 1990 සුවසැරිය මෙරටට ගෙන ඒමට කටයුතු කරන විට මාව කොතරම් විවේචනය කළාද. ජාතික ආරක්ෂාව කියලා ලොකු බිල්ලෙක් මවන්න ඇතැම් පිරිස් උත්සාහ කරනවා. මොසිප් ක්‍රමවේදය හරහා නව වැඩපිළිවෙළක් රට තුළ ක්‍රියාවට නැංවීමට උත්සාහ ගන්නවා. ඩිජිටල්කරණය සම්බන්ධයෙන් හාන්ස් විජේසූරිය මහතා පාර්ලිමේන්තු මන්ත්‍රීවරුනුත් දැනුවත් කළා. පොලි කාබනේට් කාඩ් ගේන්න හදනවා. මගේ යෝජනාව නම් එය පී.වී.සී. කාඩ් එකක් ගේන්න කියන එක. මුදල් කාරක සභාවේ සභාපතිවරයා විදියට මම මේ යෝජනාව කරනවා. ඉලෙක්ට්‍රොනික් හැඳුනුම්පතක් හැදීමට කාලයක් තිස්සේ උත්සාහ කරනවා. නමුත් තවමත් එය කර ගැනීමට නොහැකි වුණා.
කුකුළු මස් අපනයනයට රටවල් අටකින් ඉල්ලීම් කර තිබෙනවා
නි. අමාත්‍ය නාමල් කරුණාරත්න
කුකුළු මස් අපනයනය කිරීමට සඳහා අවස්ථාව ලබාගැනීම වෙනුවෙන් රටවල් අටකින් ඉල්ලීම් කළ බව කෘෂිකර්ම, පශු සම්පත්, ඉඩම් සහ වාරිමාර්ග නියෝජ්‍ය අමාත්‍ය නාමල් කරුණාරත්න මහතා පාර්ලිමේන්තුවේදී ඊයේ (11) ප්‍රකාශ කළේය.
මාලදිවයින, වියට්නාමය, ජපානය , සිංගප්පූරුව ඇතුළු රටවල් අටකින් මෙම ඉල්ලීම සිදු කළ බවත් ඉදිරියේදී ඒ සඳහා සුබවාදී ප්‍රතිචාර ලැබෙනු ඇතැයි විශ්වාස කරන බවත් නාමල් කරුණාරත්න මහතා පැවසීය.
පසුගිය වකවානුව තුළ කුකුළු මස් ආනයනය කර ඇති බව පෙන්වා දෙමින් විවිධ හේතු ඉදිරිපත් කරමින් ව්‍යාපාරිකයෝ කුකුළු මස් මිල වැඩි කරන බව පෙන්වා දෙමින් රත්නපුර දිස්ත්‍රික් සජබ මන්ත්‍රී හේෂා විතානගේ මහතා මතුකරන ලද ප්‍රශ්නයකට පිළිතුරු දෙමින් නියෝජ්‍ය අමාත්‍ය නාමල් කරුණාරත්න මහතා එසේ පිළිතුරු ලබාදුන්නේය.
මේ වන විට බිත්තරවලින් ස්වයංපෝෂිත බව පෙන්වාදුන් නියෝජ්‍ය අමාත්‍යවරයා, ස්වයංපෝෂිත ලෙස තිබූ බිත්තර කර්මාන්තය බිද වැට්ටීමට පසුගිය වකවානුවේදී කටයුතු කර තිබූ බව සඳහන් කළේය. සැලකිය යුතු මට්ටමේ කුකුළු මස් නිෂ්පාදනයක් රට තුළ සිදුවන බවද ඔහු පැවසුවේය. “අපි ගොවියාගේ ප්‍රශ්නය විසඳා තිබෙනවා. වී මිලදී ගන්නේ නැහැ කියලා කිසිම තැනක ගොවීන් උද්ඝෝෂණය කරන්නෙ නැහැ. කෘෂිකර්ම අමාත්‍යාංශය ලෙස අපට වඩා වැදගත් වන්නේ ගොවියා. වී අලෙවි මණ්ඩලයටත් යම් යම් ප්‍රමාණවලින් ගොවි ජනතාව වී අලෙවි කරනවා. මුලින් තිබූ තත්ත්වය වෙනස්වී තිබෙනවා.” නියෝජ්‍ය අමාත්‍ය නාමල් කරුණාරත්න මහතා පැවසීය.
විද්‍යා පර්යේෂණ මෙන්ම නව උත්පාදනත් ක්‍රමවත් කිරීමට ජාතික ප්‍රතිපත්තියක් හදනවා
ඇමැති ක්‍රිෂාන්ත අබේසේන
විද්‍යා හා තාක්ෂණ ක්ෂේත්‍රයේ පර්යේෂණ ඇතුළු නව උත්පාදන ක්‍රමවත්ව හා විධිමත්ව සිදු කිරීම සඳහා ජාතික ප්‍රතිපත්තියක් නිර්මාණයට පියවර ගන්නා බව විද්‍යා හා තාක්ෂණ ඇමැති ක්‍රිෂාන්ත අබේසේන මහතා පාර්ලිමේන්තුවේ දී ඊයේ (11) පැවසීය.
රටේ සංවර්ධනය සඳහා පර්යේෂණයන් හා නව උත්පාදන දායක කර ගන්නා ආකාරය සම්බන්ධයෙන් විවිධ සාකච්ඡා පවත්වමින් නව ක්‍රමවේදයන් ස්ථාපිත කිරීමට පියවර ගන්නා බව ද ඇමැතිවරයා ප්‍රකාශ කළේය.
අය-වැය තෙවැනි වර කියවීමේ විවාදයට එක්වෙමින් ඇමැතිවරයා මේ බව කියා සිටියේය.
ඇමැතිවරයා මෙසේ ද පැවසුවේය.
“විද්‍යා හා තාක්ෂණ අමාත්‍යාංශය යටතේ ආයතන 12ක් ක්‍රියාත්මක වෙනවා. රුපියල් මිලියන 5000ක් අමාත්‍යාංශයට වෙන් කර තිබෙනවා. ඊට අමතරව තවත් රුපියල් මිලියන 1000ක් ලබාදී තිබෙනවා. විද්‍යා හා තාක්ෂණ අමාත්‍යාංශයට යටත් නොවන තවත් ආයතන තිබෙනවා. ඒ ආයතනවලටත් එක්ක වෙන් කර තිබෙන මුදල ගත් විට රුපියල් බිලියන 20කට වැඩියි. රටක් සංවර්ධනය කරා යන ගමනේදී පර්යේෂණ අංශයෙන් ඉදිරියට යාම ඉතා වැදගත්. අපේ රටේ තිබෙන සම්පත්වලට අගය එකතු කර විදේශ විනිමය ඉපැයීමේ ක්‍රමවේදයක් සකස් කිරීම අපේ අරමුණ වෙනවා. ලෝක ප්‍රසිද්ධ විද්‍යාඥයන් ලංකාව තුළත් සිටිනවා. විද්‍යා හා තාක්ෂණ ප්‍රතිපත්තිය සංශෝධනයක් කරමින් එය ජාතික ප්‍රතිපත්තිය බවට පත්කරනවා. පසුගිය කාලය තුළ නව උත්පාදනයන් සඳහා වෙනම අමාත්‍යාංශයක් තිබුණේ නැහැ. පර්යේෂණ ප්‍රතිඵලයන් වාණිජකරණයට ලක් කළ හැකි ව්‍යාපෘති හඳුනා ගැනීමක් සිදු කරනවා. එහිදී මතු වන ගැටලුවලට පිළිතුරු ලබාදීම අපේ අමාත්‍යාංශයෙන් කරනවා.
කර්මාන්ත අමාත්‍යාංශය සමඟ එක්ව පොස්පේට් නිෂ්පාදනය ඉහළ නැංවීමට පියවර ගන්නවා. රටේ දරුවන් විද්‍යා අධ්‍යාපනයට නැඹුරු කිරීමක් අපි කරනවා. ඒ අනුව අධ්‍යාපන අමාත්‍යාංශයේ නව ප්‍රතිපත්තිවලට සමගාමීව අධ්‍යාපන අමාත්‍යංශයේ සහායෙන් වැඩපිළිවෙළක් සකස් කිරීමේ අරමුණ හඳුනාගෙන තිබෙනවා.
දරුවන්ට ඉහළ විද්‍යා අධ්‍යාපනයක් ලබාදීම අපේ අරමුණ වෙනවා. ගමට විද්‍යාව හා තාක්ෂණය ගෙන යාමට පියවර ගන්නවා. විදාතා මධ්‍යස්ථානවල සම්පත්, විශ්වවිද්‍යාල සම්පත් හා මානව සම්පත් යොදා ගැනීමට පියවර ගෙන තිබෙනවා. විදාතා මධ්‍යස්ථාන මඟින් සුළු හා මධ්‍ය පරිමාණ ව්‍යවසායකයන්ගේ භාණ්ඩවල ප්‍රමිතිය ඉහළ නැංවීමට විශාල කාර්යභාරයක් කළ හැකියි.
මේ අමාත්‍යාංශය විවිධ ගිවිසුම් රටවල් සමඟ අත්සන් කර තිබෙනවා. ගල්අඟුරු පරීක්ෂණ සිදු කිරීමට අපි ඉන්දියාවට යනවා. අයි.ටී.අයි. ආයතනය සමඟ අපි සාකච්ඡා කර අපේ ආයතනය තුළ ගල් අගුරු පරීක්ෂණ පැවැත්වීමට ඉදිරියේදී පියවර ගන්නවා.
ඩිජිටල් බද්දෙන් වාසියක් මිස අවාසියක් නෑ
නියෝජ්‍ය ඇමැති චතුරංග අබේසිංහ
අය-වැය මඟින් පනවා ඇති බවට විපක්ෂය චෝදනා කරන ඩිජිටල් බද්ද තුළින් වාසියක් මිස අවාසියක් සිදු නොවන බව ක්ෂේත්‍රයේ කර්මාන්තකරුවන් මේ වන විට අවබෝධ කර ගෙන ඇතැයි කර්මාන්ත සහ ව්‍යවසායකත්ව සංවර්ධන නියෝජ්‍ය ඇමැති චතුරංග අබේසිංහ මහතා පාර්ලිමේන්තුවේ දී ඊයේ (11) පැවසීය.
ඉන්දියාව, සිංගප්පූරුව වැනි රටවල් සමඟ එක්ව ඩිජිටල්කරණය වේගවත් කිරීම සඳහා හාන්ස් මහතා සමඟ සිටින කණ්ඩායම් සූදානමින් සිටින බවත් වේගයෙන් ඩිජිටල්කරණයට අවතීර්ණ වන බවත් නියෝජ්‍ය ඇමැතිවරයා ප්‍රකාශ කළේය.
අය-වැය තෙවැනි වර කියවීමේ විවාදයට එක්වෙමින් නියෝජ්‍ය ඇමැතිවරයා මේ බව කියා සිටියේය.
නියෝජ්‍ය ඇමැතිවරයා මෙසේද පැවසුවේය.
ඩිජිටල් චේන් එකක් තුළ තමයි කර්මාන්ත කළ යුත්තේ. ඩිජිටල්කරණයට නැඹුරු නොවුණොත් වෙළඳපොළට අපි සුදුසු නැති වෙන බවට ප්‍රකාශ වුණා. නමුත් දැන් තත්ත්වය වන්නේ ඩිජිටල්කරණයට වෙළඳපොළක් දැන් අවශ්‍ය නැහැ. ඒ අයි තාක්ෂණයත් දැන් එක්ව තිබෙනවා. ඩිජිටල්කරණය ගැන කතා කරන විට ෆින්ටෙක්, ක්ලවුඩ් කම්පියුටින්, සයිබර් සිකියුරිටි අංශවලට ලංකාව විශේෂ විභවතාවක් දරාගෙන සිටිනවා. ඒ ව්‍යාපාරවලට ජනතාව කැඳවීම සඳහා මේ අය-වැය තුළින් විශේෂ අවස්ථා නිර්මාණය කර තිබෙනවා. සන්නාමයක් සහිත රටක් විදියට ඉදිරියට ඒමට අපි කටයුතු කරනවා. ඩිජිටල් ආර්ථිකයට අවශ්‍ය සහාය මේ දක්වා රට තුළ තිබුණේ නැහැ. ඒ සඳහා වූ මූලික ගැටලු හඳුනාගෙන ඒවාට විසඳුම් දීමට මුලින්ම මිලියන 300 කුත් ආයෝජනයට ආරම්භයක් මේ වසරේදී අපි ගන්නවා. ඒ සඳහා යටිතල පහසුකම් නිර්මාණය මෙහිදී සිදු කරනවා. තොරතුරු තාක්ෂණ නගර රට තුළ නිර්මාණයටත් අපි අවධානය යොමු කරනවා. ඩිජිටල් වීසා ක්‍රමයක් ද අපි නිර්මාණය කරනවා. සමස්තයක් ලෙස ව්‍යාපාර, කර්මාන්ත කරන අයට ඩිජිටල්කරණය වේගවත් කිරීම තුළින් ව්‍යාපාර වැඩි වෙනවා. මෙතෙක් පැවැති රජයන්වලට මෙය කර ගත නොහැකි වුණා. ෆ්‍රීලාන්සර්ස්ලා බොහොමයක් රට තුළ සිටිනවා. ඔවුන්ට වෘත්තීයභාවයක් මෙතෙක් තිබුණේ නැහැ. ඔවුන්ට අවශ්‍ය බැංකු සහාය ලබාදීමට බැංකු පද්ධතියත් සමඟ අපි සාකච්ඡා පවත්වමින් සිටිනවා. බදු කාර්යක්ෂමතාව සඳහා බදු පදනම පුළුල් කිරීමට ඩිජිටල් තාක්ෂණය වැඩි කරනවා. මේ ක්‍රියාවලිය තුළ සාධාරණ බිමක් කුඩාම හා වැඩිම ඉඩක් තිබෙන කර්මාන්තකරුවන්ට අවස්ථාවන් නිර්මාණය වෙනවා. මේ අමාත්‍යාංශ දෙක හරහා ඩොලර් බිලියන 200ක පමණ ආදායමක් ලබාගත හැකියි. ඒ සඳහා අපි විධිමත් ලෙස යොමු විය යුතුයි.
වේදිකාවේ කතා කළ නිෂ්පාදන ආර්ථිකය අය-වැයේ නෑ
මන්ත්‍රී දිලිත් ජයවීර
ජාතික ජන බලවේගය වේදිකාවේ කතා කළ නිෂ්පාදන ආර්ථිකය මේ අය-වැය තුළ නොමැති බව සර්වජන බලය පත් කළ මන්ත්‍රී දිලිත් ජයවීර මහතා පාර්ලිමේන්තුවේ දී ඊයේ (11) පැවසීය.
නව නිර්මාණ සහ නවෝත්පාදන සඳහා විශාල මුදලක් මේ ආණ්ඩුවෙන් වෙන් කර ඇතැයි සිතුවද, එවැනි දෙයක් සිදුව නැති බව ද මන්ත්‍රීවරයා පැවසුවේය.
අයවැය තෙවැනි වර කියවීමේ විවාදයට එක්වෙමින් මන්ත්‍රීවරයා මේ බව කියා සිටියේය.
මන්ත්‍රීවරයා මෙසේද පැවසුවේය.
ජාතික ආදායමෙන් සියයට 60 ක් අද ණය හා පොලී ගෙවීමට යොදා ගන්නවා නම්, සියයට 32 ක් අපේම අපනයනකරුවන් අපනයන ආදායම් මෙරටට ගේන්නේ නැත්නම්, බහු ජාතික සමාගම් අපේ ආදායම් ගෙන යනවා නම් අපේ මිනිසුන් ජීවත් කරන්න ඉතිරිව තිබෙන්නේ මොන තරම් සොච්චමක්ද? එතකොට ජනතාව දුගී නැතිද? මේ ආණ්ඩුව එන්නේ වෙනසක් කරන්න. නව පර්යේෂණ සිදු කර ඒ තුළින් කෘෂි කර්මාන්තයේ කාර්යක්ෂමතාව වැඩි කර ගන්නේ කොහොමද කියලා බලන්න ඕන. ණය අරගෙන ඒවා ගෙවීම සඳහා නව උත්පාදන කරන්නේ නැත්නම් එය සුදුසු නැහැ. මේ අය-වැයේ ජනතාවට බලාපොරොත්තු තැබිය හැක්කේ කොතැනද කියන ගැටලුව තිබෙනවා. මේ අය-වැය දෙස හොඳට බැලුවොත් අපි කිසිසේත්ම නිර්මාණශීලි නොවී ජාත්‍යන්තර මූල්‍ය අරමුදල සමඟ කුමන ගනුදෙනු කළත් වැඩක් නැහැ. රටේ ආදායම මත බදු පනවමින් මෙරට මිනිසුන් ඉතාම දුෂ්කර තත්ත්වයට පත් කරමින් කටයුතු කිරීම තමයි ජාත්‍යන්තර අරමුදල කරන්නේ. ඔවුන්ගේ පැත්තෙන් එය සාධාරණයි.
අපේ රටේ මිනිසුන් වෙනුවෙන් මේ ආර්ථිකය මෙහෙය විය යුතුයි. ඒ සඳහා අපි හෘද සාක්ෂියට එකඟව කටයුතු කළ යුතුයි. මේ රට කවදා හරි ගොඩ එනවා දකින්න ආසාවක් මටත් තිබෙනවා. අපේ සහාය ඒ සඳහා හැකි සෑම අවස්ථාවකදීම ලබාදෙනවා.
සයිබර් ආරක්ෂණ පනත ඉක්මනින් ගේනවා
නියෝජ්‍ය ඇමැති එරංග වීරරත්න
සයිබර් ආරක්ෂණ පනතක් ඉක්මනින් ගෙන ඒමට කටයුතු කරන බව ඩිජිටල් ආර්ථික නියෝජ්‍ය ඇමැති එරංග වීරරත්න මහතා පාර්ලිමේන්තුවේ දී ඊයේ (11) පැවසීය.
මාස හයක් වැනි කාලයක් තුළදී ඩිජිටල් හැඳුනුම්පත ගෙන ඒමට ආණ්ඩුව පියවර ගන්නා බව ද නියෝජ්‍ය ඇමැතිවරයා ප්‍රකාශ කළේය. අය-වැය තෙවැනි වර කියවීමේ විවාදයට එක්වෙමින් නියෝජ්‍ය ඇමැතිවරයා මේ බව කියා සිටියේය. නියෝජ්‍ය ඇමැතිවරයා මෙසේද පැවසුවේය. වෙබ් සයිට් හැක් කරනවා කියලා කියනවා. ශ්‍රී ලංකා ෂර්ට් ආයතනයට සිකියුරිටි සම්බන්ධයෙන් උපදෙස් දෙන්න පුළුවන්. නමුත් බලාත්මක කිරීමට නොහැකියි. සයිබර් ආරක්ෂණ පනතක් ගෙන ඒමට පියවර ගන්නවා. වෙබ් සයිට් කිසිදාක හැක් නොවී තිබෙන ආකාරයට මේ පනතෙන් කටයුතු කරනවා. ඩිජිටල් ආර්ථික ප්‍රතිපත්තිය අපේ ආණ්ඩුව කාලයක් තිස්සේ සිට නිර්මාණය කළ දෙයක්. අවුරුදු පහක් සඳහා එම ප්‍රතිපත්තිය අපි නිර්මාණය කර තිබෙනවා. ඩිජිටල් හැඳුනුම්පතටත් විශේෂ අවධානයක් අපි ලබාදෙනවා. මේවා සම්බන්ධයෙන් පටු දේශපාලන අරමුණු ඉටු කර ගැනීමට කරන විවේචන අපි පිළිගන්නේ නැහැ.
ජාතික ප්‍රතිපත්තියක් අනුව අපි ජාතික ජන බලවේගය කටයුතු කරනවා. විපක්ෂය හිතන විදියට අපේ කකුලෙන් අදින්න බැහැ. ඩිජිටල් හැඳුනුම්පත හදන විට පී.වී.සී. කාඩ් එකකට යා යුතු බවට ඇතැම් මන්ත්‍රීවරුන් ප්‍රකාශ කළා. ජනාධිපතිවරයාගේ ඩිජිටල් ප්‍රධාන උපදේශක හාන්ස් මහතා ගැන චෝදනාවක් කළා. ඒ සියලු චෝදනා අසත්‍යයි.
අබාධිත පුද්ගලයන් වෙනුවෙන් පාර්ලිමේන්තු සංසදයක්
ආබාධිත පුද්ගලයන්ට පාර්ලිමේන්තුව විසින් සංසදයක් පිහිටුවීමට නියමිත බව කථානායක ජගත් වික්‍රමරත්න මහතා පාර්ලිමේන්තුවේදී ඊයේ (11) පැවැත්වෙන බවද නිවේදනය කළේය. එහි රැස්වීමක් ඊයේ පාර්ලිමේන්තු සංකීර්ණයේදී පවත්වන බවත් අදාළ රැස්වීමට කැමැත්තක් දක්වන සියලු දෙනාට සහභාගී විය හැකි බවද කථානායකවරයා දැනුම් දුන්නේය.
