ගොඩකවෙල ප්‍රාදේශීය ලේකම් කොට්ඨාසයට හදිසි මරණ පරීක්ෂකවරයකු වසරක පමණ සිට නොමැතිකම නිසා ග්‍රාමසේවා වසම් 44 ක ජනතාව දැඩි අපහසුතාවයකට පත්ව ඇති බව ප්‍රදේශවාසීහු පවසා සිටිති.
මෙම තත්ත්වය මතුවී ඇත්තේ ගොඩකවෙල ප්‍රාදේශීය ලේකම් කොට්ඨාසයේ සේවය කළ හදිසි මරණ පරීක්ෂකවරුන් සියලු දෙනා වයස සම්පූර්ණ වීම හේතුවෙන් විශ්‍රාම යාමෙන් පසු ඒ සඳහා මෙතෙක් කිසිවෙකු පත්කර නැති නිසා බව ජනතාව චෝදනා කරති.
ගොඩකවෙල ප්‍රාදේශීය ලේකම් කොට්ඨාසය, රෙජිස්ට්‍රාර් කොට්ඨාස හයකින් සමන්විත අතර, ජනගහනය අසූ පන්දාහකට අධිකය. වාර්ෂිකව මරණ 400කට අධික ප්‍රමාණයක් සිදුවන බවට ජනගහන තොරතුරුවල සටහන්ව ඇත. එම කොට්ඨාසයට සිංහල මාධ්‍යයේ හදිසි මරණ පරීක්ෂක තනතුරු දෙකක් සහ දමිළ මාධ්‍යයෙන් මරණ පරීක්ෂක තනතුරක් අනුමත වී ඇති බව අධිකරණ අමාත්‍යාංශයේ වෙබ් අඩවියේ සටහන්ව ඇත.
වර්තමානයේ දී මරණයක් සිදු වූ විට කහවත්ත, කලවාන, වැලිගෙපොළ යන ප්‍රාදේශීය ලේකම් කොට්ඨාසයට අයත් මරණ පරීක්ෂකවරයෙකු ගෙන්වා ගෙන එම කාර්ය සිදුකර ගැනීමට සිදුව ඇත. කහවත්ත මූලික රෝහලක් බැවින් කහවත්ත ප්‍රදේශයට සිටින හදිසි මරණ පරීක්ෂකවරයා කාර්යබහුල වී ඇති බවත් කහවත්ත ප්‍රාදේශීය ලේකම් කොට්ඨාසය ආශ්‍රිතව වාර්ෂිකව මරණ පන්සියයකට අධික ප්‍රමාණයක් සිදුවන බවත් ජනගහන තොරතුරුවල සඳහන්ව ඇත. එබැවින් කහවත්ත කොට්ඨාසය ආශ්‍රිතව සේවය කරන මරණ පරීක්ෂකවරුන් ඒ සඳහා යොදවා ගැනීම ප්‍රායෝගිකව දුෂ්කර වී ඇත. මරණ පරීක්ෂකවරයා සම්බන්ධ කර ගැනීමද ගැටලුවක් වී ඇත. වෙනත් ප්‍රදේශයකින් මරණ පරීක්ෂකවරයෙකු ගෙන්වා ගැනීම සඳහා මළ ගිය පුද්ගලයාගේ ඥාතීන්ට විශාල කාලයක් හා ශ්‍රමයක් වැය කිරීමට සිදුව ඇත.
රක්වාන ප්‍රදේශය ආශ්‍රිතව මුස්ලිම් ජනතාව බහුතරයක් ජීවත් වන අතර, ඔවුන්ගේ ආගමික ඇදහිලි අනුව පැය 24 ඇතුළත මළ සිරුරක් භූමදානය කළ යුතුය. නමුත් පවතින ගැටලුව හේතුවෙන් එකී කාලසීමාව තුළ මළ සිරුරක් භූමදාන කිරීමට ඇති හැකියාව අවම මට්ටමකට පත්ව ඇත.
ගොඩකවල ප්‍රාදේශීය ලේකම් කොට්ඨාසය ආශ්‍රිත ප්‍රාදේශීය රෝහල් දෙකක්, වතු රෝහල් දෙකක්, ආයුර්වේද රෝහලක් පවතී. රත්නපුර දිස්ත්‍රික්කයේ පැරණිතම රෝහල් ත්‍රිත්වයෙන් එකක් වන රක්වාන රෝහලද ඒ අතර වේ. එබැවින් මෙම රෝහල් ආශ්‍රිතව හා නිවෙස් තුළ වාර්ෂිකව පුද්ගලයන් මියයෑම් සැලකිය යුතු ප්‍රමාණයක් සිදුවන බැවින් ප්‍රදේශවාසීන් පවසන්නේ පුරප්පාඩුව පවතින තනතුර සඳහා කඩිනමින් පුද්ගලයන් බඳවා ගන්නා ලෙසයි.
