ඉංගිරියට නුදුරු හඳපාන්ගොඩ ප්‍රදේශයේ ජනතාවට මහත් අඩුපාඩුවක්ව පැවති නොමිලයේ පැවැත්වෙන ආයුර්වේද ප්‍රජා වෛද්‍ය මධ්‍යස්ථානයක් පසුගියදා විවෘත කෙරිණි.
හඳපාන්ගොඩ ග්‍රාමයෙහිම පිහිටි නිවෙසක හිමිකරුව සිට මේ වනවිට ජීවතුන් අතර නොමැති පුද්ගලයකුට පින් පිණිස ඔහුගේ ඥාතිවරයකු විසින් මෙම ආයුර්වේද මධ්‍යස්ථානය පවත්වාගෙනයාම සඳහා අවශ්‍ය ගොඩනැඟිල්ල පරිත්‍යාග කර තිබීම විශේෂත්වයක් වන අතර, “පී. අයිඩින් අනුස්මරණ ආබාධිත පුනරුත්ථාපන සහ ආයුර්වේද වෛද්‍ය මධ්‍යස්ථානය” ලෙස එය නම් කර තිබේ.
ආයුර්වේද දෙපාර්තමේන්තුවේ අධීක්ෂණය යටතේ මෙම සායනය ක්‍රියාත්මක වන අතර, 623ඒ හඳපාන්ගොඩ නැඟෙනහිර වැඩිහිටි සමිතිය මඟින්, ආරෝග්‍යා පදනමේ සභාපති තලපත්පිටියේ පුඤ්ඤාලෝක සහ අධ්‍යක්ෂ ජනරාල් අරියධම්ම හිමිවරුන්ගේ අනුශාසනා මත ජනතා අයිතියට පත්කිරීම සිදුවිය. ඉංගිරිය ප්‍රාදේශීය ලේකම් නිසංසලා පෙරේරා මහත්මියගේ උපදෙස් පරිදි, ප්‍රජා සෞඛ්‍ය වෛද්‍ය නිලධාරිනී අසංගි ප්‍රනාන්දු සහ උදයකාන්ති යන අයගේ සම්පත් දායකත්වයෙන්, සංවර්ධන නිලධාරි (දේශීය වෛද්‍ය) නිමේෂා කාරියවසම් සහ හඳපාන්ගොඩ නැඟෙනහිර ග්‍රාම නිලධාරී බී.සී. කුඩාවිතාරණ ඇතුළු නිලධාරීන්ගේ එකතුවෙන් මෙම වැඩසටහන සංවිධානය කර තිබූ අතර, ඉංගිරිය සමථ මූල මණ්ඩලයේ සභාපති වසන්ත කරුණාරත්න සහ සමාජ සේවා අංශයේ සියලු නිලධාරීන්ගේ සහයෝගය ඊට හිමිවිණි.
