2025 ජුබිලි වසර වෙනුවෙන් පවත්වන ලද අගරදගුරු පදවි ජන සන්නිවේදන සමුළුව පසුගියදා (15) බොරැල්ල අගරදගුරු නිල නිවසේ ශ්‍රවණාගාරයේදී පැවැත්විණි.
“මිහිමත ප්‍රේමයේ සුබ වදන පතුරාලනු වස් මාධ්‍යකරණයේ සහ කලා ක්ෂේත්‍රයේ අපගේ වගකීම් සොයා යමු” තේමාව කරගනිමින් අගරදගුරු අතිඋතුම් මැල්කම් කාදිනල් රංජිත් හිමිපාණන්ගේ ප්‍රධානත්වයෙන් අගරදගුරු පදවි ජන සන්නිවේදන සහ සංස්කෘතික කේන්ද්‍රය මඟින් ජන සන්නිවේදන සමුළුව සංවිධාන කර තිබුණි.
ශ්‍රී ලංකා රදගුරු සම්මේලනයේ මාධ්‍ය අංශය භාර කොළඹ සහයක රදගුරු අතිඋතුම් මැක්ස්වෙල් සිල්වා හිමිපාණන් ද මේ සමුළුවට සහභාගී වූ අතර සියත රූපවාහිනී නාළිකාවේ ජ්‍යෙෂ්ඨ මාධ්‍යවේදී ලාල් හේමන්ත මාවලගේ, ප්‍රංශ පුවත් සේවයේ ශ්‍රී ලංකාව සහ මාලදිවයින නියෝජනය කරන ජ්‍යෙෂ්ඨ මාධ්‍යවේදී අමල් ජයසිංහ, සිනමා හා රුපවාහිනී නිෂ්පාදක, අධ්‍යක්ෂ තිරකතා රචක, ග්‍රන්ථ කර්තෘ විශ්වවිද්‍යාල බාහිර කථිකාචාර්ය ආචාර්ය බර්ට්‍රම් නිහාල් සහ වර්බුම් නාළිකා නිර්මාතෘ සභාපති මිලන් ද සිල්වා යන මහත්ම මහත්මීහු මේ සමුළුවේ සම්පත් දායකයන් ලෙස එක්වූහ.
අගරදගුරු පදවි ජන සන්නිවේදන සමුළුව අගරදගුරු පදවි ජන සන්නිවේදන අධ්‍යක්ෂ ජූඩ් ක්‍රිෂාන්ත පියතුමන්ගේ මඟපෙන්වීම ඇතිව අගරදගුරු පදවි ජන සන්නිවේදන සහ සංස්කෘතික කේන්ද්‍රය මඟින් සංවිධාන කර තිබූ අතර සමුළුවට පූජා ප්‍රසාදීන් වහන්සේ විශාල පිරිසක් පැවිදි සොයුර සොයුරියන් මෙන්ම කලාකරුවන්, මාධ්‍ය ආයතන නියෝජනය කරමින් මාධ්‍යවේදින් මෙන්ම සමාජ මාධ්‍ය ජාලා ක්‍රියාකාරීහු පිරිසක් මේ අවස්ථාවට සහභාගි වූහ.
