ප්‍රමාණවත් සාක්ෂි හෝ කරුණු නොමැතිව නඩු පවරා වාරණ නියෝගයක් ලබා ගැනීමෙන් විත්තිකරුවන්ට සිදු වූ අගතියට රුපියල් 50,000ක වන්දියක් ගෙවන්නැයි කොළඹ ප්‍රධාන දිසා විනිසුරු සඳුන් විතාන මහතා පාමංකඩ ක්‍රීඩා සමාගමකට නියෝග කළේය.
තවද බැලූ බැල්මට ජය ගතහැකි කරුණු නොමැතිව නඩු පවරා විත්තිකරුවන්ට එරෙහිව වාරණ නියෝගයක් ගැනීමෙන් සිදු කළ අගතියට වන්දි ගෙවන ලෙස ද පැමිණිල්ල මඟින් ඉල්ලා සිටින අතුරු තහනම් ඉල්ලීම ප්‍රතික්ෂේප කරන ලෙස අධිකරණය නියෝග කළේය.
පාමංකඩ හයි ඔක්ටේන් ෆිට්නස් සෙන්ටර් පුද්ගලික සමාගම (High Octane fitness center) සි.එම්.යූ. වීරවර්ධන සහ පුද්ගලික බැංකුවක් විත්තිකරුවන් කරමින් පැවරූ නඩුවක් සලකා බැලීමෙන් පසුව දිසා විනිසුරුවරයා මෙම නියෝගය නිකුත් කර ඇත.
රුපියල් මිලියන 80ක මුදලක් විත්තිකාර වීරවර්ධන මහතාට ලබා දී තිබියදී, අනීතිකව හා බියගන්වා රුපියල් මිලියන 125ක චෙක්පත් ලබාගෙන මුදල් කරවා ගැනීම සඳහා කටයුතු කරන බවත් එසේ ලබාගත් චෙක් පත්වලින් මුදල් ලබා ගැනීම හා එම චෙක්පත්වලට මුදල් නිකුත් කිරීම වළක්වන නියෝග විත්තිකරුවන්ට නිකුත් කරන ලෙස පැමිණිලිකාර සමාගම ඉදිරිපත් කළ පෙත්සමේ සඳහන් වේ.
පැමිණිල්ලේ කරුණු සලකා බැලූ දිසා විනිසුරුවරයා චෙක්පත් බැංකුවට දී මුදල් ගැනීම හෝ එම චෙක්පත්වලට මුදල් නිකුත් කිරීම වළක්වමින් විත්තිකරුට හා බැංකුවට වාරණ නියෝගයක් කර තිබේ.
පසුව විත්තිකරු වෙනුවෙන් කරුණු දක්වමින් සඳහන් කර ඇත්තේ පැමිණිලිකාර සමාගමේ අධ්‍යක්ෂවරුන් වන දරීන් වීරසිංහ යන අයගෙන් මෙම චෙක්පත් වාහන ගනුදෙනුවක් සඳහා ලබාගෙන ඇති බවය.
දෙපාර්ශ්වයේ කරුණු සලකා බැලූ ප්‍රධාන දිසා විනිසුරුවරයා විත්තිකරු අනීතිකව හෝ බලෙන් චෙක්පත් ලබාගත් බවට පිළිගත හැකි සාක්ෂියක් පැමිණිල්ල මඟින් ඉදිරිපත් කර නොමැති බවත්, අඩුම තරමේ පොලීසියකට හෝ පැමිණිල්ලක් ඉදිරිපත් කර නොමැති බවත් පෙන්වා දෙමින් අතුරු තහනම් නියෝග නිකුත් කිරීම ප්‍රතික්ෂේප කළේය.
විත්තිකරු වාහන ව්‍යාපාරයක් සඳහා මුදල් ගනුදෙනු කළ බවට ඉදිරිපත් කළ කරුණු සලකා බැලීමෙන් පසුව මෙම වන්දි ගෙවන ලෙසට නියෝග කරමින් අතුරු තහනම් නියෝග ඉල්ලීම ප්‍රතික්ෂේප කළේය.
