අලුත් අවුරුදු උත්සව සමය තුළදී මිනිස් පරිභෝජනයට නුසුදුසු ආහාර අලෙවි කළ පුද්ගලයන් 136කට විරුද්ධව පසුගිය සති දෙක තුළදී නඩු පැවරූ බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ ලේකම් චමිල් මුතුකුඩ මහතා “දිනමිණ”ට ඊයේ (07) පැවසීය.
රට පුරා වෙ‍ෙළඳසල් 1,094ක් මුල් කර ගනිමින් වැටලීම් 114ක් පසුගිය සති දෙක තුළදී සිදු කළ බවත් කල් ඉකුත් වූ ආහාර අලෙවිය, සනීපාරක්ෂාවට අහිතකර අයුරින් ආහාර නිෂ්පාදනය, මිනිස් පරිභෝජනයට නුසුදුසු ආහාර අලෙවිය, සනීපාරක්ෂාවට නුසුදුසු අයුරින් ආහාර ගබඩා කිරීම සහ ප්‍රවාහනය යනාදී කාරණා මුල් කර ගනිමින් මෙම වැටලීම් සිදු කළ බවත් ඒ මහතා ප්‍රකාශ කළේය.
මහජන සෞඛ්‍ය පරීක්ෂකවරුන් 2,000ක් යොදා ගනිමින් මෙම වැටලීම් සිදු කරන බවත් මාර්තු මස 24 වැනිදා සිට පොසොන් උත්සව කාලය අවසන් වන තෙක් මෙම වැටලීම් අඛණ්ඩව සිදු කරන බවත් ඒ මහතා කීය. ජනතාව වැඩිපුර ගැවසෙන රට පුරා තිබෙන හෝටල්, ආපණශාලා ඇතුළු ආහාර අලෙවි කරන ස්ථානයන්හි මෙම වැටලීම් සිදු කරන බව ද ඒ මහතා පැවසුවේය.
