කලක සිට වනසතුන් දඩයම් කිරීමේ ජාවාරමක නියැළී සිටින බව කියන දඩයම්කරුවන් දෙදෙනකු මෙරට නිෂ්පාදිත තුවක්කු දෙකක් සමඟ පෙරේදා (06) අලුයම් කාලයේ උඩදුම්බර පොලිස් වසමේ දාගෑවිල්ල රක්ෂිතයේදී අත්අඩංගුවට ගැනීමට දාගෑවිල්ල වනජීවි බිට්ටු කාර්යාලයේ නිලධාරින්ට හැකි වී තිබේ.
එළැඹෙන සිංහල හා දමිළ අලුත් අවුරුදු උලෙළට සමගාමීව රන්දෙණිගල, රන්ටැඹේ අභය භූමි කලාපයේ රක්ෂිත වනාන්තරවල සිටින ගෝනා, මුවා, ගවයා, ඉත්තෑවා, මීමින්නා, වැලි මුවා සහ වලි කුකුළා ඇතුළු වෙනත් වන සතුන් මරා මස් කර එම මස් මහනුවර හා ඒ අවට ප්‍රදේශවල හෝටල්වලට ඉතා ඉහළ මිල ගණන්වලට අලෙවි කිරීමේ සූදානමක් පවතින බවට උඩදුම්බර, දාගෑවිල්ල වනජීවි බීට්ටු කාර්යාලයේ නිලධාරීන්ට තොරතුරක් ලැබී තිබේ.
එම තොරතුරු මත වනජීවි දෙපාර්තමේන්තුවේ මධ්‍යම පළාත් භාර සහකාර අධ්‍යක්ෂක ගාමිණී වික්‍රමතිලක සහ හසලක වනජීවී අඩවි ආරක්ෂක ඩබ්ලිව්.ඒ. මහින්ද විජේසිංහ යන මහත්වරුන්ගේ උපදෙස් මත දාගෑවිල්ල බිට්ටුවේ අඩවි සහකාර සසික බණ්ඩාර මහතා සමඟ නියාමක කණ්ඩායමක් ඉකුත් 05 වැනිදා සහ 06 වැනිදා රාත්‍රියේ වනජීවි කලාපයට අයත් දාගෑවිල් බීට්ටු රක්ෂිතයේ හදිසි මෙහෙයුමක් ක්‍රියාත්මක කරනු ලබීය.
දින දෙකක් පුරා රාත්‍රී කාලයේ කරනු ලැබු එම හදිසි මෙහෙයුමේදී මෙරට නිෂ්පාදිත ගිනි අවි දෙකක් රැගෙන සතුන් දඩයම් කිරීමට යමින් සිටි පුද්ගලයින් දෙදෙනෙකු දාගෑවිල්ල වනජීවි රක්ෂිත කැලයේදී පෙරේදා (06) අලුයම 4.30ට පමණ අත්අඩංගුවට ගැනීමට එම නිලධාරීන් කණ්ඩායමට හැකිවී තිබේ.
මෙම සැකකරුවන් හසලක පොලිස් වසමේ මොරයාය හා හඳගනාව යන ග්‍රාමනිලධාරි වසම්වල පදිංචි වයස අවුරුදු 35ත් 40ත් අතර වයසේ පසුවෙන පුද්ගලයින් බවට හඳුනාගෙන තිබේ. සැකකරුවන් ගිනි අවි සමඟ පෙරේදා (06) තෙල්දෙණිය මහේස්ත්‍රාත් අධිකරණය හමුවට ඉදිරිපත් කිරීමෙන් අනතුරුව ශරීර ඇප මත මුදාහැර තිබේ.
