ඉන්දියාව සහ පාකිස්තානය අතර උද්ගත වූ යුදමය වාතාවරණය දකුණු ආසියාවේ න්‍යෂ්ටික යුද්ධයක් දක්වා පුළුල් විය හැකි බවට අනතුරු අඟවමින් රාජ්‍යතාන්ත්‍රික මාර්ග හරහා අර්බුද විසඳා ගන්නා ලෙස ලොව පුරා රටවල් රැසක රාජ්‍ය නායකයන් ඉන්දියාවෙන් සහ පාකිස්තානයෙන් ඉල්ලා ඇතැයි විදෙස් මාධ්‍ය වාර්තා කරයි. කාශ්මීර් ත්‍රස්ත ප්‍රහාරයට වගකිව යුතු ක්‍රියාමාර්ග ඉන්දියාව මෙන්ම පාකිස්තානය ද ඒකාබද්ධව සිදු කළ යුතු බවත්, දෙරට අතර රාජ්‍යතාන්ත්‍රික සාකච්ඡා පැවැත්විය යුතු බවත් රටවල් රැසක් ප්‍රකාශ කර ඇති අතර, දකුණු ආසියාවේ සාමය පවත්වාගෙන යෑමේ වගකීම ඇති රටවල් දෙකක් වන ඉන්දියාව සහ පාකිස්තානය සංවාද හරහා මනා සංයමයකින් යුතුව මේ මොහොතේ කටයුතු කළ යුතුව ඇතැයි අවධාරණය කර තිබේ. දකුණු ආසියානු කලාපයේ යුද උණුසුම ඉහළ නැංවූ මේ සිදුවීම සම්බන්ධව සමීපව නිරීක්ෂණය කරන බව අමෙරිකාව සහ චීනය ප්‍රකාශ කර ඇති අතර, ඉන්දියාව සහ පාකිස්තානය අතර සාමය උදාකිරීම සඳහා අවශ්‍ය සියලු ආකාරයෙන් සහයෝගය ලබා දීමට ඉදිරිපත්වන බව බ්‍රිතාන්‍ය අගමැතිවරයා ප්‍රකාශ කර ඇතැයි වාර්තා වේ. ජපානය, කටාර්, එමිරේට්ස්, ජර්මනිය, ප්‍රංශය ඇතුළු රටවල් රැසක් හමුදා ක්‍රියාමාර්ග අත්හිටුවන ලෙසත්, රාජ්‍යතාන්ත්‍රික සාකච්ඡා මාර්ගයෙන් ගැටලු විසඳා ගන්නා ලෙසත් ඉන්දියාවෙන් සහ පාකිස්තානයෙන් ඉල්ලා ඇතැයි වාර්තා වේ.
