කාශ්මීර් ත්‍රස්ත ප්‍රහාරයට සම්බන්ධ අපරාධකරුවන් හා ඔවුන්ගේ ආධාරකරුවන් නීතිය හමුවට ඉදිරිපත් කර වින්දිතයන්ගේ පවුල්වලට යුක්තිය ඉටු කරන ලෙස රුසියානු ජනාධිපති ව්ලැදිමිර් පුටින් ඉන්දීය අගමැතිවරයාගෙන් ඉල්ලීමක් කළ බව හින්දු පුවත්පත වාර්තා කළේය. පසුගිය සඳුදා ඉන්දීය අගමැතිවරයාට දුරකතන ඇමතුමක් ලබා දෙමින් පුටින් මේ ඉල්ලීම කර ඇති බවත්, ත්‍රස්ත ප්‍රහාරය හෙළා දකින බවට ප්‍රකාශයක් ද නිකුත් කළ බවත් හින්දු පුවත්පත වැඩිදුරටත් වාර්තා කළේය. ත්‍රස්ත ප්‍රහාරයෙන් ජීවිත අහිමි වූවන් වෙනුවෙන් සිය ශෝකය පළ කළ රුසියානු ජනාධිපතිවරයා ත්‍රස්තවාදයට එරෙහි සටනේදී ඉන්දියාවට පූර්ණ සහයෝගය පළ කළ බව වාර්තා වේ. මේ වසරේ අගභාගයේ ඉන්දියාවේ පැවැත්වීමට නියමිත ඉන්දීය- රුසියා වාර්ෂික සමුළුවට පැමිණෙන ලෙස එහිදී ඉන්දීය අගමැතිවරයා පුටින්ට ඇරියුම් කළ බවත්, මොස්කව් නුවරදී හෙට (9) සමරනු ලබන දෙවැනි ලෝක මහා යුද්ධයේ 80 වැනි විජයග්‍රහණ සැමරුම වෙනුවෙන් සුබපැතුම් ද එක් කළ බවත් හින්දු පුවත් සේවය සඳහන් කරයි.
