දැරණියගල, උඩමාලිබොඩ ඡන්ද මධ්‍යස්ථානයක් අසලදී පුද්ගලයන් තිදෙනකුට ආයුධයකින් ඇන තුවාල කළැයි දැරණියගල පොලීසිය අත්ඩංගුවට ගත් එම ප්‍රදේශයේම ආරණ්‍යය සේනාසනයක චීවරධාරියකු රුපියල් ලක්ෂයක ශරීර ඇපයක් මත මුදා හැරීමට අවිස්සාවේල්ල මහේස්ත්‍රාත් ජනක ප්රසන්න අමරසූරිය මහතා ඊයේ (07) නියෝග කළේය.
පළාත් පාලන මැතිවරණය පැවති පෙරේදා (06) උඩමාලිබොඩ ඡන්ද මධ්‍යස්ථානය අසල දී මෙම සැකකාර චීවරධාරියා දැරණියගල ප්‍රාදේශීය සභාවට තරග කළ සමගි ජන බලවේගයේ අපේක්ෂකයකු වන රංජිත් කුරුප්පු මහතා සහ ඔහුගේ ආධාරකරුවන් දෙදෙනකුට තියුණු ආයුධයකින් ඇන තුවාල කර ඇතැයි දැරණියගල පොලීසිය අධිකරණයට දැනුම් දුන්නේය.
මේ වන විට තුවාලකරුවන් දැරණියගල රෝහලේ ප්‍ර‍තිකාර ලබමින් සිටින බවද පොලීසිය අධිකරණයට කරුණු ඉදිරිපත් කළේය.
මැතිවරණය සම්බන්ධයෙන් ඇතිවූ කතාබහක් දුරදිගගොස් මෙම සිද්ධිය සිදුව ඇතැයි ද පොලීසිය අධිකරණයට දැනුම් දුන්නේය.
ඉදිරිපත් වූ කරුණු සැලකිල්ලට ගත් අධිකරණය සැකකරුට ඇප නියම කරමින් සිද්ධියට අදාළ නඩුව ලබන 22 වැනිදා යළි කැඳවීමට නියෝග කළේය.
දැරණියගල පොලිස් ස්ථානාධිපති මංජුල ජයවර්ධන මහතාගේ උපදෙස් පරිදි පරීක්ෂණ පැවැත්වේ.
