හියංගණ මහවැලි ගඟේ සැඩපහරට හසුවී ගසාගෙන ආ පුද්ගලයකු, මහියංගණ පොලිස් ස්ථානයේ ස්ථානාධිපතිතුමා ඇතුළු පොලිස් නිලධාරීන් කණ්ඩායමක් එක්ව ඊයේ (07) දින උදෑසන බේරා ගැනීමට සමත්ව ඇත.
මහවැලි ගඟේ දියපහරට හසුව කිසියම් අයකු ගසාගෙන යන බවට මහියංගණ පොලිස් ස්ථානයේ ස්ථානාධිපති ඩබ්ලිව්.ඩබ්ලිව්.සී.ආර්. වික්‍රමරත්න මහතාට දුරකතන ඇමතුමක් ලැබී තිබුණේ ඊයේ (07) පෙරවරු 7.00ට පමණය. එම අවස්ථාවේ පොලිස් ස්ථානයේ සිටි නිලධාරීන් පිරිසක් සමඟ කඩිනමින් හසලක වේරගංතොට පාලම හන්දිය ප්‍රදේශයට පැමිණ ගඟේ ගසාගෙන පැමිණි පුද්ගලයා බේරා ගැනීමට එම නිලධාරීහු යුහුසුලුව කටයුතු කර තිබුණි.
මහියංගණ පොලිස් ස්ථානයේ ස්ථානාධිපතිතුමා සමඟ මාපාකඩවැව පොලිස් විද්‍යාලයේ උප පොලිස් පරීක්ෂක විජේකෝන් මහතා හා සිවිල් ආරක්ෂක නිලධාරී (027496) ජයසිංහ, (11130) නිශාන්ත යන අය එක්ව ඇති අතර, සිවිල් ආරක්ෂක නිලධාරීන් දෙදෙනා ගඟට පැන ගඟේ ගසාගෙන පැමිණි පුද්ගලයාගේ දිවි බේරාගෙන ඇත.
ඒ මොහොතේ එම පුද්ගලයාගේ සිරුරේ ඇඳුම් කිසිවත් තිබී නොමැති අතර, ප්‍රදේශවාසියකු ලබාදුන් ඇඳුම් අන්දවා, ඔහුට ප්‍රථමාධාර ලබාදීම සිදු කර ඇත. පසුව එම පුද්ගලයාව පොලීසියට ගෙන ගොස් ඔහුට ආහාරපානාදියෙන් සත්කාර කොට ඔහුගේ ඥාතීන්ට භාරදීමට ද පොලිස් නිලධාරීන් කටයුතු කර තිබිණි.
පොලීසිය එලෙස දිවි බේරාදී ඇත්තේ 02 කණුව, මොරයාය, හසලක ලිපිනයේ පදිංචි කේ. අමරදාස නම් වන වයස අවුරුදු 60ක පුද්ගලයකුගේය.
