ජනමාධ්‍ය, සෞඛ්‍ය සහ පරිසර ඇමැතිවරයා ලෙස කටයුතු කරමින් සිටියදී 2021/2023 කාලයේදී පෞද්ගලික කාර්ය මණ්ඩලයේ සේවකයන් වශයෙන් හිතවතුන් කිහිපදෙනකුට පත්වීම් දී ඔවුන් වෙත අමාත්‍යාංශයෙන් ගෙවන ලද වැටුප්, අතිකාල දීමනා තම පෞද්ගලික වියදම් සහ දේශපාලන කටයුතුවලට යොදා ගැනීමෙන් රජයට රුපියල් ලක්ෂ 80කට අධික මුදලක් පාඩු කළ බව කියන සිද්ධියක් සම්බන්ධයෙන් හිටපු සෞඛ්‍ය ඇමැති කෙහෙළිය රඹුක්වැල්ල මහතා ලබන 20 වැනිදා දක්වා රක්ෂිත බන්ධනාගාරගත කරන ලෙසට කොළඹ ප්‍රධාන මහේස්ත්‍රාත් තනුජා ලක්මාලි මහත්මිය ඊයේ (07) නියෝග කළාය.
ශ්‍රී ලංකා මහ බැංකුවේ සැක කටයුතු ලේඛන පිළිබඳ අංශයට ලද තොරතුරකට අනුව අල්ලස් හෝ දූෂණ විමර්ශන කොමිසමට කරන ලද පැමිණිල්ලකට අදාළව කරුණු වාර්තා කිරීමෙන් අනතුරුව මෙලෙස නියෝග කෙරිණි.
ප්‍රකාශයක් දීම සඳහා ඊයේ අපරාධ පරීක්‍ෂණ දෙපාර්තමේන්තුව වෙත ගිය අවස්ථාවේදී එහි නිලධාරීන් විසින් සැකකාර හිටපු අමාත්‍යවරයා අත්අඩංගුවට ගෙන අධිකරණය වෙත ඉදිරිපත් කර තිබිණි.
සැකකාර හිටපු ඇමැතිවරයා ජනමාධ්‍ය, සෞඛ්‍ය හා පරිසර අමාත්‍යවරයා වශයෙන් කටයුතු කරමින් සිටියදී ඔහුගේ පෞද්ගලික කාර්ය මණ්ඩලයේ තනතුරු සඳහා හිතවතුන්, ඥාතීන් හා දේශපාලන ආධාරකරුවන් පත් කරගෙන ඇති බව ද අල්ලස් කොමිසමේ විමර්ශන නිලධාරීහු අධිකරණයට දැන්වූහ.
එම තනතුරු සඳහා පත් කරගන්නා ලද පුද්ගලයන් වෙනුවෙන් වැටුප් ගෙවිය යුතු බව පවසමින් සැකකාර පුද්ගලයා ජනමාධ්‍ය, සෞඛ්‍ය හා පරිසරය යන අමාත්‍යාංශ වැය බරින් රුපියල් 8,005,814.73ක මුදලක් එසේ වංචාසහගතව ලබාගෙන ඇති බව ද විමර්ශන නිලධාරීහු අධිකරණයට පෙන්වා දුන්හ.
2021 සහ 2023 වර්ෂවල ජනමාධ්‍ය සෞඛ්‍ය සහ පරිසර අමාත්‍ය ධුර හෙබවූ කෙහෙළිය රඹුක්වැල්ල මහතා එම අමාත්‍යාංශවලින් පෞද්ගලික පත්වීම් දෙමින් රජයට ලක්ෂ 80කට අධික මුදල් ප්‍රමාණයක පාඩුවක් සිදු කිරීම සම්බන්ධයෙන් බී වාර්තා තුනක් ඔස්සේ ඊයේ දින නඩු ගොනු කර තිබිණි.
සිද්ධියට අදාළ චෝදනා තුන වන්නේ, 2021 වර්ෂයේ ජනමාධ්‍ය අමාත්‍යවරයා ලෙස සිටියදී රුපියල් 2,794,133 මුදලක් හා 2023 -2024 වර්ෂවල සෞඛ්‍ය අමාත්‍යවරයාව සිටියදී රුපියල් 4,665,080 මුදලක් මෙන්ම පරිසර අමාත්‍යවරයා ලෙස සිටිදී 546,474 මුදලක් වංචා කරමින් පෞද්ගලික කාර්ය මණ්ඩලයේ සේවකයන් සඳහා තම හිතවතුන් කිහිපදෙනකුට පත්වීම් දී ඔවුන් වෙත අමාත්‍යාංශයෙන් ගෙවනු ලබන වැටුප් හා දීමනා තම පෞද්ගලික වියදම් සඳහා මෙන්ම දේශපාලන කටයුතුවලට වියදම් කිරීම සම්බන්ධවය.
සිද්ධියට අදාළව අල්ලස් හෝ දූෂණ විමර්ශන කොමිසම වෙනුවෙන් අධිකරණයේ පෙනී සිටි සහකාර අධ්‍යක්ෂ තුෂිතා ජයනෙත්ති ඇතුළු විමර්ශන නිලධාරීන් අධිකරණයට කරුණු දක්වමින් පවසා සිටියේ,
“ස්වාමීනි, 2021 වර්ෂයේ ජනමාධ්‍ය අමාත්‍යවරයා ලෙස සිටින විට තම පෞද්ගලික කාර්ය මණ්ඩලයක් නාමිකව පත් කරගෙන ඔවුන්ට ලැබෙන වැටුප්, දීමනා, අතිකාල දීමනා මෙම සැකකාර අමාත්‍යවරයාට පක්ෂපාතී පුද්ගලයන් දෙදෙනකු ලවා පෞද්ගලික බැංකුවක් වෙත බැර කරගෙන තම පෞද්ගලික කටයුතු සහ දේශපාලන කටයුතු සඳහා යොදාගෙන තිබෙනවා. ජනමාධ්‍ය අමාත්‍යාංශයේ එවකට පෞද්ගලික කාර්ය මණ්ඩලයේ පුද්ගලයන් පස්දෙනකුගේ වැටුප් මෙලෙස ලබා ගත් බවට මේ වන විට ප්‍රකාශ ලබාගෙන තිබෙනවා.
“ස්වාමීනි, ඔවුන් දීලා තිබෙන ප්‍රකාශ අනුව එම නිලධාරීන් එම අමාත්‍යාංශයේ කිසිදු කටයුත්තක් කර නොමැති බවත් සඳහන් වෙනවා” යනුවෙනි.
සැකකාර අමාත්‍යවරයාගේ උපදෙස් මත සුමිත් රත්නායක සහ යෝජිත රත්නායක යන පෞද්ගලික සේවකයන් දෙදෙනා පෞද්ගලික ගිණුමක් සාදා ගන්නා ලද මුදල් වෙනත් ගිණුම්වලට සම්ප්‍රේෂණය වීම සඳහා කටයුතු කර තිබෙන බව ද විමර්ශන නිලධාරීහු අධිකරණයට කරුණු දැක්වූහ.
සිද්ධියට අදාළ පෞද්ගලික බැංකුවේ කළමනාකරුගෙන් ගන්නා ලද ප්‍රකාශ අනුව සැකකාර අමාත්‍යවරයාගේ උපදෙස් මත වංචාසහගතව ගන්නා ලද එම මුදල් ස්ථාවර තැන්පතු ගිණුම් 14කට සම්ප්‍රේෂණය වීමට කටයුතු කර ඇති බව ද විමර්ශන නිලධාරීහු අධිකරණයට දැන්වූහ.
සිද්ධියට අදාළව කළමනාකාර සහකාර පත්වීම් පහක් සහ කාර්ය සහායක පත්වීම් දෙකක් ලබා දෙමින් මෙම වංචාව කර ඇති බව ද විමර්ශන නිලධාරීහු අධිකරණයට කරුණු දැක්වූහ.
මෙම සිද්ධියට අදාළව මහනුවර ප්‍රදේශයේ සැකකරු හා සම්බන්ධ ඥාතීන් හිතවත් දේශපාලන පිරිස්ගෙන් ප්‍රකාශ සටහන් කර ගැනීමට තිබෙන බවත් ඒ සඳහා ආධාර උපදෙස් ලබාදුන් පිරිස පිළිබඳව ද විමර්ශන කටයුතු සිදු කරන බවත් අල්ලස් කොමිසම අධිකරණයට කරුණු දැක්වීය.
සැකකාර අමාත්‍යවරයා ජනමාධ්‍ය අමාත්‍යවරයා ලෙස පෞද්ගලික කාර්ය මණ්ඩලයට 15 දෙනකුගෙන් යුත් පිරිසක් පත් කරගෙන එහි නාමිකව පස් දෙනකු යොදවා මෙලෙස දූෂණ විරෝධී ලෙස මුදල් වංචා කර ඇති බව විමර්ශන නිලධාරීහු වැඩිදුරටත් අධිකරණයට කරුණු දැක්වූහ. සිද්ධිය සම්බන්ධයෙන් තවදුරටත් කරුණු දැක්වූ අල්ලස් කොමිසම වෙනුවෙන් අධිකරණයේ පෙනී සිටි නිලධාරීන් සඳහන් කරනු ලැබුවේ,
“ස්වාමීනි, පත්වීම්ලාභීන් එම කාලය තුළ ජනමාධ්‍ය අමාත්‍යාංශය තුළ කිසිදු රැකියාවක් කර නැහැ. ඔවුන්ට ලැබෙන අතිකාල දීමනා ආදිය ලබාගෙන රජයට රුපියල් විසිහත් ලක්ෂයක පමණ පාඩුවක් සිදු කර තිබෙනවා. පත්වීම් දෙන අවස්ථාවේදී ස්කෑන් ඕඩර් නමින් අත්සනක් යොදා එම මුදල් පෞද්ගලික ගිණුම් වෙත යැවීමට කටයුතු කර තිබෙනවා.” යනුවෙනි.
2021 අගෝස්තු මාසයේ සිට 2023 නොවැම්බර් මාසය දක්වා කාලය තුළ සෞඛ්‍ය අමාත්‍යවරයා ලෙස සිටිමින් පෞද්ගලික කාර්ය මණ්ඩලයට පුද්ගලයන් හත් දෙනකුට පත්වීම් දෙමින් ඔවුන්ට ලැබෙන වැටුප් දීමනා අතිකාල දීමනා ආදිය තම පෞද්ගලික කටයුතු සඳහා සහ දේශපාලන කටයුතුවලට යොදාගෙන තිබෙන බව ද විමර්ශන නිලධාරීහු අධිකරණයට කරුණු දැක්වූහ.
එම ගන්නා ලද මුදල්වලින් මහජන දිනයට ගෙවීම් පවා කර ඇති බවත් මෙම සිද්ධියට අදාළ එම අමාත්‍යාංශයේ 54 දෙනකුගෙන් ප්‍රකාශ සටහන් කර ගැනීමට තිබෙන බව ද නිලධාරීහු අධිකරණයට කරුණු දැක්වූහ.
2023 නොවැම්බර් මස සිට 2024 ජනවාරි මස දක්වා පරිසර අමාත්‍යවරයා ලෙස සිටිමින් ඉහත සඳහන් කරන පරිදිම පත්වීම්ලාභීන් තිදෙනකුගේ වැටුප් සහ දීමනා, අතිකාල දීමනා ගෙන රජයට රුපියල් ලක්ෂ පහකට අධික මුදලක් වංචා කර ඇති බවය.
ඔහුගේ අමාත්‍යාංශ කාර්ය මණ්ඩල සේවකයන් සඳහා ගෙවීමට යැයි පවසා සැකකරු එසේ මුදල් ගෙන ඇති නමුත් එම මුදල් එම තනතුරුවලට පත් කරගන්නා ලද පුද්ගලයන් වෙනුවෙන් නොගෙවා ඔහුගේ දේශපාලන ආධාරකරුවන්ට, පක්ෂ කාර්යාලය නඩත්තු කරන්නන්ට හා එම පක්ෂ කාර්යාලයේ සේවකයන්ට එසේ දී වංචාවක් කර ඇති බවට සිද්ධිය සම්බන්ධයෙන් සිදු කළ විමර්ශනවලදී කරුණු අනාවරණය වූ බව ද විමර්ශන නිලධාරීහු අධිකරණයට කරුණු දැක්වූහ.
සැකකරුගේ පෞද්ගලික කාර්ය මණ්ඩලයේ තනතුරුවලට පත් කරන ලද සේවකයන් වෙනුවෙන් ගෙවීමට යැයි පවසා වංචාසහගතව ගත් එම මුදල් ඔහුගේ දේශපාලන ආධාරකරුවන්ට, පක්ෂ කාර්යාලය නඩත්තු කරන්නන්ට හා එහි වෙනත් සේවකයන්ට ගෙවා රජයට අයුතුසහගත හා නීති විරෝධී ලෙස පාඩුවක් සිදු කර ඇති බැවින් ඔහු රක්ෂිත බන්ධනාගාරගත කරන ලෙස ද විමර්ශන නිලධාරීහු අධිකරණයෙන් ඉල්ලා සිටියහ.
සිද්ධියට අදාළ තවත් සැකකරුවන් අත්අඩංගුවට ගැනීමට විමර්ශන කරමින් පවතින බව විමර්ශන නිලධාරීහු අධිකරණයට දැන්වූය.
සැකකරුට ඇප දෙන ලෙසට ඔහු වෙනුවෙන් පෙනීසිටි නීතිඥයන් අධිකරණයෙන් ඉල්ලීමක් කළ ද පැමිණිල්ල මෙහෙයවූ අල්ලස් කොමිසමේ විමර්ශන නිලධාරීන් අධිකරණයට දැක්වූ කරුණු සලකා බැලූ මහේස්ත්‍රාත්වරිය සැකකරු මෙම මස 20 වැනිදා දක්වා රක්ෂිත බන්ධනාගාරගත කරන ලෙසට නියෝග කළාය.
සැකකාර ඇමැතිවරයාගේ සෞඛ්‍ය තත්ත්වය පිළිබඳ සලකා බැලීමට බන්ධනාගාර අධිකාරියට නියෝග කළාය.
ඡායාරූපය – නිශ්ශංක විජේරත්න
