අපරාධයක වින්දිතයන් හා සාක්ෂිකරුවන් ආරක්ෂා කිරීමේ අධිකාරියේ නියෝගය මත මතුගම ගාමිණී මාවතේ නි‍ෙවසක ආරක්ෂාවට යොදවා සිටි පොලිස් නිලධාරියකු පෙරේදා (06) රාත්‍රී 8.15ට පමණ සැක කටයුතු වාහනයක් දෙසට වෙඩි ප්‍රහාර 05ක් එල්ල කර ඇති බවත් ඉන් කිසිම පුද්ගලයකුට හෝ දේපළකට හානියක් සිදුවී නැති බවත් මතුගම පොලීසිය කියයි.
මෙසේ පොලිස් ආරක්ෂාව යොදවා ඇත්තේ අපරාධ වින්දිතයකු වන මල්වතු කංකානම්ලාගේ අසංක ප්‍රකාශ් පෙරේරා නම් වූ අයකුට අයත් නි‍ෙවසටය.
තමා අදාළ නි‍ෙවසේ උඩු මහලේ බැල්කනියේ රැඳී සිටිමින් රාජකාරියේ යෙදී සිටියදී කළු පැහැති ජීප් රථයක් මතුගම ඇතුළත්මුදලි වටරවුමේ සිට ගාමිණී මාවත දෙසට ආ බවත් එය නි‍ෙවස ඉදිරිපිටදී වේගය අඩු කළ අතර, ඒ සමඟම වෙඩි ශබ්දයක් ඇසුණු බවත් පොලිස් සැරයන් (62907) සිල්වා කර තිබූ ප්‍රකාශයේ සඳහන් වේ. ඒ අනුව ජීප් රථයෙන් නි‍‍වෙසට වෙඩි තැබූ බවට සැක කර ජීප් රථය දෙසට වෙඩි තැබූ බවත් ඔහු පොලීසියට කර තිබූ ප්‍රකාශයේ වැඩිදුරටත් සඳහන් වේ. මේ අතර ජීප් රථය පැදවූ නිහාල් ජයසිංහ යන අය පොලීසියට පැමිණ ප්‍රකාශ කර ඇත්තේ තමා පාරේ ගමන් කරමින් සිටින විට වෙඩි තැබීමක් සිදු වූ බවයි. ඔහු මෙවර පළාත් පාලන මැතිවරණයට එජාපයෙන් තරග කළ අපේක්ෂකයකු වන අතර, ඔහු ගමන් කළ ජීප් රථය ද පොලිස් භාරයට ගෙන ඇත.
කළුතර කොට්ඨාසය භාර ජ්‍යෙෂ්ඨ පොලිස් අධිකාරි කාවින්ද පියසේකර මහතාගේ උපදෙස් මත මතුගම මූලස්ථාන ප්‍රධාන පොලිස් පරීක්ෂක පරාක්‍රම උඩවත්ත මහතාගේ මෙහෙයවීම යටතේ මේ පිළිබඳව වැඩිදුර පරීක්ෂණ පැවැත්වේ.
