අගමැතිනි, ආචාර්ය හරිනි අමරසූරිය මෙණෙවිය සහ GSP+ අධීක්ෂණ මෙහෙයුමේ කොටසක් ලෙස යුරෝපීය බාහිර ක්‍රියාකාරී සේවයේ දකුණු ආසියානු අංශයේ ප්‍රධානී චාල්ස් වයිට්ලි මහතා අතර හමුවක් පසුගියදා (05) පැවැත්විණි.
අගමැතිවරිය විසින් යුරෝපා සංගම් නියෝජිත පිරිස පිළිගත් අතර, විශේෂයෙන් GSP+ රාමුව හරහා යුරෝපා සංගමය සමඟ හවුල්කාරිත්වය ශක්තිමත් කිරීමට ශ්‍රී ලංකාවේ කැපවීම තහවුරු කළාය.
දරිද්‍රතාව පිටුදැකීම, ඩිජිටල් පරිවර්තනය සහ “Clean Sri Lanka” මෙහෙයුම ඇතුළු රජයේ ප්‍රධාන ප්‍රමුඛතා පිළිබඳ සාකච්ඡාවේදී අවධානය යොමු කෙරිණි.
සංහිඳියාව ස්ථාපිත කිරීම සඳහා රජයේ අඛණ්ඩ උත්සාහය පිළිබඳව අවධාරණය කළ අගමැතිවරිය මත්ද්‍රව්‍ය ජාවාරම, මිනිස් ජාවාරමට එරෙහිව සටන් කිරීම සඳහා නීති සම්පාදනය කිරීම සහ මාර්ගගත ආරක්ෂණ පනත ඇතුළු වත්මන් නීති ප්‍රතිසංස්කරණ පිළිබඳව ද අවධානය යොමු කළාය.
ශ්‍රී ලංකාවේ නව ප්‍රතිපත්ති, විශේෂයෙන් GSP+ යන්ත්‍රණයේ මූලික අරමුණු සමඟ අනුකූල වන ඒවා හඳුන්වාදීම යුරෝපා සංගම් නියෝජිත පිරිසගේ ප්‍රසාදයට හේතු විය.
ඔවුන් GSP+ සහන සඳහා නැවත අයදුම් කිරීමේ ක්‍රියාවලිය පිළිබඳ මඟපෙන්වීමක් ලබාදුන් අතර ශ්‍රී ලංකාවේ විධිමත් සංවර්ධන ක්‍රියාවලින් සඳහා සහාය දැක්වීමට ඇති කැමැත්ත නැවත අවධාරණය කළහ.
මෙම සංවාදයේදී IMFහි සහභාගිත්වය සහ කාන්තා දේශපාලන හා ආර්ථික සහභාගිත්වය වැඩි කිරීමේ වැදගත්කම පිළිබඳව තවදුරටත් සාකච්ඡා කරන ලදී.
ශ්‍රම බලකායට වැඩි කාන්තා පිරිසක් ඇතුළත් කරගැනීම සඳහා ළමාරක්ෂක සේවා, වැඩිහිටි සත්කාර සහ ප්‍රවාහනය වැනි ආධාරක පද්ධති වැඩිදියුණු කිරීමේ අවශ්‍යතාව අගමැතිවරිය අවධාරණය කළාය.
ආර්ථික, සංස්කෘතික සහ සංචාරක අංශ හරහා ශ්‍රී ලංකාව සමඟ සබඳතා වැඩිදියුණු කිරීම සඳහා යුරෝපා සංගමයේ අවධානය යොමුව ඇති බව ශ්‍රී ලංකාවේ යුරෝපා සංගමයේ තානාපති අතිගරු කාමන් මොරේනෝ මහතා මෙම හමුවේදී සඳහන් කළේය.
