ගල්වල ප්‍රදේශයේ මාළු අල්ලමින් සිටි පුද්ගලයකු දියේ ගිලී අතුරුදන් වීමක් සහ නාවිල්ආරු පාලමෙන් පුද්ගලයකු ඇදවැටී දියේ ගිලී මියයෑමක් පිළිබඳ වාර්තා වී ඇතැයි පොලිස් මාධ්‍ය කොට්ඨාස සඳහන් කරයි.
ඒ අනුව පසුගියදා (05) සවස් කාලයේ හිඟුරක්ගොඩ පොලිස් වසමේ ගල්වල ප්‍රාදේශයේ මාළු අල්ලමින් සිටි පුද්ගලයකු දියේ ගිලී අතුරුදන් වූ බවට හිඟුරක්ගොඩ පොලිස් ස්ථානට ලද පැමිණිල්ලක් මත විමර්ශන ආරම්භ කර තිබේ. මෙහිදී අතුරුදන් වූ පුද්ගලයා වයස අවුරුදු 44ක් වූ රිකිල්ලගස්කඩ, හේවාහැට ප්‍රදේශයේ පදිංචිකරුවකු බව සඳහන් වෙයි. අතුරුදන් වූ පුද්ගලයා සොයා හිඟුරක්ගොඩ පොලීසිය වැඩිදුර විමර්ශන ආරම්භ කර ඇති බව පොලිස් මාධ්‍ය අංශය පැවසීය. තවද පසුගිය දා (04) පොතුවිල් පොලිස් වසමේ නාවිල්ආරු පාලමෙන් පුද්ගලයකු ඇදවැටී දියේ ගිලී මියගොස් ඇති බව වාර්තා වෙයි. මේ පිළිබඳව පොතුවිල් පොලිස් ස්ථානයට ලද පැමිණිල්ලක් මත විමර්ශන ආරම්භ කර ඇති බව ද පොලිස් මාධ්‍ය අංශය පවසයි. මෙලෙස අනතුරට පත්වී ඇත්තේ වයස අවුරුදු 56ක් වූ සොරිකල්මූණ, චවලකඩේ ප්‍රදේශයේ පදිංචිකරුවෙකි. මියගිය පුද්ගලයා තවත් පිරිසක් සමඟ කල්මුණේ ප්‍රදේශයේ සිට විනෝද චාරිකාවක් සඳහා පොතුවිල් ප්‍රදේශයට පැමිණ සිටියදී මෙම අනතුරට ලක් වී ඇති බව විමර්ශනවලදී අනාවරණය වී ඇත.
මේ පිළිබඳව පොතුවිල් පොලීසිය දැඩි දුර විමර්ශන සිදු කරන බව පොලිස් මාධ්‍ය කොට්ඨාසය පවසයි.
