ශක්තිමත් හා අවංක රාජ්‍ය සේවයක් ලබාදීම සඳහා ඒකාබද්ධ මෙහෙවරකට එක්වන්නැයි විපක්ෂ නායක සියලු විපක්ෂ බලවේගයන්ගෙන් ඉල්ලීමක් කළේය.
සත්‍යවාදී පාලනයක් සඳහා වන මහජන ඉල්ලීමට ප්‍රතිචාර වශයෙන් මෙම මුලපිරීමට නායකත්වය දීමට සමගි ජන බලවේගය සූදානම් බව ද හෙතෙම විශේෂ ප්‍රකාශයක් කරමින් ඊයේ (07) පැවසුවේය.
අපහාස – උපහාස, තර්ජන ගර්ජන, මඩ ප්‍රහාර, කුමන්ත්‍රණ හා අභියෝග මැද සමගි ජන බලවේගය වෙනුවෙන් ඡන්දය ප්‍රකාශ කර සහයෝගය දුන් ජනතාවට සිය ආචාරය පුද කර සිටින බවත් අප රටේ ප්‍රජාතන්ත්‍රවාදය ශක්තිමත් කිරීම වෙනුවෙන් ඉදිරියට පැමිණ මෙම මැතිවරණය ශක්තිමත් කිරීමට සහයෝගය දුන් සියලු රටවැසියන්ට සිය ගෞරවය පුද කර සිටින බවත් විපක්ෂ නායකවරයා පැවසීය.
මෑත කාලයේ ජනාධිපතිවරණයකදී හා මහමැතිවරණයකදී විශාල ජනවරම් දෙකක් ලබාගත් රජය මාස 6ක් වැනි කෙටි කාලයක් තුළ අතිවිශාල පරිහානියකට කඩාවැටීමකට ලක්ව ඇති බවත් රටේ ජනතාව විසින් විපක්ෂයේ සියලු දෙනා එකට එකතු කරගෙන කටයුතු කරන ලෙසට පණිවිඩයක් දී ඇති බවත් ජනතා විමුක්ති පෙරමුණ මෙම පළාත් පාලන මැතිවරණය ක්‍රියාත්මක කළේ ජනාධිපතිවරණය ක්‍රියාත්මක කරන ආකාරයට බවත් මොවුන් ආගම දහම පවා මැතිවරණය වෙනුවෙන් භාවිත කළ බවත් විපක්ෂ නායක සජිත් ප්‍රේමදාස මහතා පැවසීය.
රටේ ජනතාව මේ වනවිට බොරුවට තිත තබා ඇති බවත් රටේ ජනතාව සත්‍යවාදී මහජන සේවාවක් අනුමත කර ඇති බවත් බොරුවට තිත තබා බොරුව පරාජය කරමින් සත්‍යවාදී, ශක්තිසම්පන්න මහජන සේවාවක් උදෙසා විපක්ෂයේ සියලු බලවේග එකතු විය යුතු යැයි කියන ජනමතය තුළ මේ අභියෝගාත්මක වගකීම වෙනුවෙන් නායකත්වය ලබා දීමට සමගි ජන බලවේගය සූදානම් බවත් විපක්ෂ නායකවරයා කියා සිටියේය.
ප්‍රජාතන්ත්‍රවාදය ආරක්ෂා කරන පුද්ගලයන් ලෙස ජනමතයට හිස නවා විපක්ෂයේ සියලු දෙනා එකට එකතු කරගෙන ජනතාව අපේක්ෂා කළ විශිෂ්ට ජනතා සේවාවක් විනිවිදභාවයෙන් යුක්තව, ප්‍රතිපත්තිගරුකව, එකමුතුභාවය හරහා රටේ ජනතාවට දැවැන්ත සේවාවක් ඉටු කරන බවත් ඒ වෙනුවෙන් සමගි ජන බලවේගය නායකත්වය ලබා දෙන බවත් විපක්ෂ නායක සජිත් ප්‍රේමදාස මහතා වැඩිදුරටත් පැවසීය.
