මොනරාගල, සෙවනගල ශ්‍රී විජයාරාමය හා බදුල්ල විනීතගම ශ්‍රී බෝධිරාජාරාමය යන උභය විහාරාධිපති ශාස්ත්‍රපති අධ්‍යාපනවේදී රිල්පොළ රාහුල හිමිපාණන් වහන්සේ වෙත උඩරට අමරපුර සාමාග්‍රී සංඝ සභාව මඟින් උඩරට අමරපුර නිකායේ ඌව වෙල්ලස්ස දෙදිසාවේ ප්‍රධාන සංඝනායක පදවිය පිරිනමා ඇත.
නායක පදවිය පිළිබඳ ශ්‍රී සන්නස්පත්‍ර ප්‍රදානෝත්සවය සෙවනගල ශ්‍රී විජයාරාම විහාරස්ථානයේදී පැවැත්විණි. උඩරට අමරපුර සාමාග්‍රී සංඝ සභාවේ මහානායක ගිරාඹේ මංගල නායක ස්වාමීන් වහන්සේගේ ප්‍රධානත්වයෙන් පැවැති මෙම උත්සවයේදී අභිනව නායක ස්වාමීන්වහන්සේ වෙත විජිනිපත පිළිගැන්වීම ඌව පළාත් ආණ්ඩුකාර නීතිඥ ජේ.එම්. කපිල ජයසේකර මහතා අතින් සිදු කෙරුණු අතර, මෙම අවස්ථාවට ශ්‍රී දළදා මාලිගාවේ දියවඩන නිලමේ තැන්පත් ප්‍රදීප් නිලංග දෑල, සෙවනගල ප්‍රාදේශීය ලේකම් නයන රංජිත් ප්‍රියශාන්ත, සහකාර ප්‍රාදේශීය ලේකම් යමුනා බන්දුල යන මහත්ම මහත්මීන් ඇතුළු දායක දායිකාවෝ විශාල පිරිසක් සහභාගි වූහ.
