නිවැසියන් කතරගම වන්දනාවේ ගොස් එද්දී කිසිවකු විසින් ඔවුන්ගේ අවන්හල බිඳ රුපියල් 88,000ක් වටිනා මුදල් හා දේපොළ සොරකම් කිරීමේ සිද්ධියක් සම්බන්ධයෙන් අගලවත්ත පොලීසිය පරීක්ෂණ පවත්වයි.
අගලවත්ත, මිල්ලගස්මුල්ලේ පදිංචි පොත්මිටියගේ දොන් සේනාරත්න (52) යන අය විසින් කරන ලද පැමිණිල්ලකට අනුව මේ පිළිබඳ පරීක්ෂණ ආරම්භ කොට තිබේ. තමා ඉකුත් 4 වැනිදා රාත්‍රී 10.30ට පමණ අවන්හල වසා කතරගම වන්දනාවේ ගිය බවත්, යළි 6 වැනිදා උදේ 7.30ට අවන්හල විවෘත කර බලන විට පසුපස දොරේ අගුළු කඩා ඇතුළු වූ අයකු මුළුතැන්ගෙයි තිබූ ගෑස් සිලින්ඩර 2ක් හා රුපියල් 3,000ක මුදලක් සොරාගෙන ගොස් තිබූ බවත් ඔහු පොලීසියට කර තිබූ පැමිණිල්ලේ සඳහන් වේ.
අගලවත්ත පොලිස් ස්ථානාධිපති පොලිස් පරීක්ෂක ධම්මික සිල්වා මහතාගේ මෙහෙයවීම යටතේ මේ පිළිබඳව වැඩිදුර පරීක්ෂණ පවත්වයි.
