ශාමලී තම දියණිය සහ පැවිදි වූ
සාමණේර හිමියන් සමඟ
ගෑස් සිලින්ඩරයක් පිපිරී මුහුණේ ඇති වූ විකෘතිතාවයක් සමඟ, ස්වාමියා හැරයාමෙන් පසු දරුවන් සමඟ කිසිදු හවුහරණක් නොමැතිව, අනුන්ගේ නි‍ෙවසක දිවි ගෙවන පස්දරු මවකගේ සංවේදී කතාවක් පොලොන්නරුව, හබරණ, ඊරිගේඔය, සූරියගම ගම්මානයෙන් අපට අසන්නට ලැබිණි. ගෑස් සිලින්ඩරයක් පිපිරී මුහුණේ ඇති වූ විකෘතිතාවයක් සමඟ ඇයට කිසිදු අයෙකු රැකියාවක් ලබා නොදෙන පසුබිමක රුපියල් අටදහස් පන්සීයේ අස්වැසුමෙන් සහ අසල්වාසීන් ලබාදෙන ආධාර උපකාරයෙන් ජීවත්වෙන මෙම අසරණ මව, නමින් ශාමලී සේනාධීර වේ.
ඇයගේ පිරිමි දරුවකු විවාහ වී පිට පළාතක ජීවත් වන අතර, ගැහැනු දරුවකු හිඟුරක්ගොඩ ළමා නිවාසයෙන් අධ්‍යාපනය ලබා මේ වනවිට සබරගමුව විශ්වවිද්‍යාලයේ අධ්‍යාපනය හදාරමින් සිටින්නීය.
තවත් පිරිමි දරුවකු පාසල් ගමනට විරාමය තබා මීට දින කිහිපයකට පෙර පෞද්ගලික ආයතනයක රැකියාවට ගොස් සිටින්නේය.
තවත් දියණියක් හිඟුරක්ගොඩ ආනන්ද බාලිකාවේ 7 වසරේ අධ්‍යාපනය ලබන්නීය.
බාල පුතු ඓතිහාසික දිඹුලාගල ආරණ්‍ය සේනාසනයේ හබරණ සුමංගලාලංකාර නමින් පැවිදිව පිරිවෙන් අධ්‍යාපනය ලබති.
හබරණ, සූරියගම ගම්මානයේ ජීවත් වන ශාමලී සේනාධීර මහත්මිය නිවෙස හිමි කාන්තාව විදේශගතව සිට මේ මස 30 වැනිදා ශ්‍රී ලංකාවට පැමිණෙන බැවින් ජීවත් වන නිවෙස ද භාරදීමට සිදුව තිබේ.
විදෙස්ගත කාන්තාව මේ මස 30 වැනිදා ලංකාවට පැමිණීමත් සමඟ නි‍ෙවස භාරදීමෙන් පසු ජීවත්වීමට නි‍ෙවසක් නොමැතිව දෙලොවක් අතර, දරුවන් සමඟ තනිවී සිටින ශාමලී සේනාධීර මහත්මිය තම ජීවිත කතාව හැඬූ කඳුළෙන් මෙලෙස ඉදිරිපත් කළාය.
‘මම කඩවලවැව ඉස්කෝලේ කම්කරුවකු ලෙස වැඩ කළා. මට දරුවො පස් දෙනෙක් ඉන්නවා. ගෙදරදි ගෑස් සිලින්ඩරයක් පුපුරලා තමා මගේ මූණ පිච්චුණේ. දැන් මාව කිසිම කෙනෙක් කිසිම රස්සාවකටවත්, කුලියකටවත් ගන්නේ නැහැ. මගේ දු‍ෙවක් හිඟුරක්ගොඩ ළමා නිවාසයක ඉගෙන ගෙන මේ වෙනකොට සබරගමුව සරසවියේ අධ්‍යාපනය ලබනවා. එයා තව අවුරුද්දකින් අධ්‍යාපනය අවසන් කරනවා, තවත් දු‍ෙවක් හිඟුරක්ගොඩ ආනන්ද බාලිකාවේ 07 වසරේ ඉගෙන ගන්නවා. ඉතින් එයාට උගන්නන්න විදිහකුත් නෑ. උගන්නන්න මිල මුදල් නැති හින්දා බාල පුතු, දිඹුලාගල නායක හාමුදුරුවන්ට භාරදීලා මහණ කළා. මට මේ ගමේ අප්පච්චි කියලා කෙනෙක් අක්කරයක ඉඩමක් දුන්නා. ඒ අප්පච්චිත්, ගමේ උදවියත් පුළුවන් හැටියට අපිට උදවු කරනවා. රුපියල් අටදහස් පන්සීයේ අස්වැසුමත් ලැබෙනවා. දැනට අපි ඒකෙන් ජීවත් වෙනවා. අපිට ජීවත් වෙන්න ගෙදරක් නැති නිසා විදේශගත කාන්තාවක් මේ ගෙදර පාළුවට යන හින්දා අපිට පදිංචි වෙන්න ඉඩ දුන්නා. එයා මේ මාසේ 30 වැනිදා ලංකාවට එනවා. එතකොට මේ ගෙදර භාර දෙන්න ඕනේ. ඊට පස්සේ අපිට ඉන්න ගෙදරක් නැහැ. අපට දුන්න ඉඩමේ පොඩියට ටකරන් මඩුවක් ගහගෙන ඉන්නවා. ඒකෙ මේ දුවත් එක්ක ඉන්න ආරක්ෂාවක් නෑ. පුළුවන්නම් අපට කාමර දෙකක ස්ථිර ගෙයක් හදලා දෙන්න, ඒක බුදු බව අත්වෙන පින්කමක් මහත්තයෝ, ශාමලී සේනාධීර මහත්මිය හැඬූ කඳුළින් එලෙස පැවසුවාය.”
ඉතා අන්ත අසරණභාවයට පත්ව සිටින ශාමලී සේනාධීර මහත්මියගේ පවුල වෙනුවෙන් පරිත්‍යාගශීලි දායකයෙක්, දානපතියෙක් හෝ ආයතනයක් ස්ථිර නි‍ෙවසක් ඉදි කරදීමට ඉදිරිපත් වන්නේ නම්, ඒ සඳහා සිවිල් ආරක්ෂක බළකායෙන් හෝ යුද හමුදාවෙන්, ශ්‍රම දායකත්වය ලබා දීමට තමන් වහන්සේ මැදිහත් වන බව මේ පිළිබඳ අදහස් දක්වමින් ඓතිහාසික දිඹුලාගල ආරණ්‍ය සේනාසනාධිපති දිඹුලාගල රාහුලාලංකාර නාහිමියෝ සඳහන් කළහ.
ඔවුන්ගේ ලිපිනය ශාමලී සේනාධීර, ඊරිගේඔය, සූරියගම, හබරණ, හිඟුරක්ගොඩ. දුරකතන අංකය – 0771559654
බැංකු ගිණුම් විස්තර, එස්.ආර්.ඩී.එස්. සේනාධීර, ලංකා බැංකුව හිඟුරක්ගොඩ, ගිණුම් අංකය, 89851278
